Ronaldo hian Fifa duhsakna uchuak a dawng bik em ni?

Ronaldo hian Fifa duhsakna uchuak a dawng bik em ni?
Tarlan tawh thin angin, Republic of Ireland nena World Cup qualifiers match an khelh tumin Portugal captain Cristiano Ronaldo chu red card hmanga hnawhchhuah a ni a; Dara O’Shea hnungzanga a nghawk kha match thum hrem theihna khawp tharum thawhna a nih avangin 2026 Fifa World Cup-ah hian Portugal game hmasa pahnih a khelh theih loh mai rinna a pian hman hnuah Fifa chuan match thum hrem tura a hnuhnung match hnih chu kum khat enthlak hnua player nungchang ena kenkawh chauh tura thutlukna a siam tak avangin Portugal fans an thaw huai!
Violent conduct an tihin a ken tel match thum hremnaa a hmasaber chu Ronaldo hian Armenia an tum tumin a tlingtla fel tawh a, hremna hnuhnung pahnih Fifa-in kum khat atana a thuhruksak leh tak bawk si avangin a tum rukna atana World Cup finals a khelh turah Portuguese superstar hian harsatna tawh tur a nei ta rih lo!
He boruakah hian mi tam takin mak tiin an mitko an san awk awk a; Fifa disciplinary code for violent conduct-in match thum hrem tur a tih laia Ronaldo laka zahngaihna an lantir dan chu a ‘fair’ meuh em tih zawhna an zawt a; tun thlatir lama Irish-ho laka sihnih faia an tlawm tuma O’Shea laka a khawsak dan kha red card phu hliah hliahah pawh match thum zet keng tel tharum thawhna rawngkai liau liau nia a lan tlat avangin Real forward hlui hian a bik taka Fifa duhsakna a dawng ta mai em ni ti pawl an awm phah ta a ni.
Ngaihnathiamna an pek chungchangah Fifa disciplinary committee lam chuan tan chhan nei tha an inti a, Republic of Ireland an hmachhawn hmaa international match a khelh vawi 225-a red card hmu miah lo a nih vangin Ronaldo kha match hnih dang hren khawtlaisak phu hliah hliahah an ngai tih an thuchhuah chuan a tarlang!
Tarlan tawh thin angin, Portugal qualifier match hnuhnungbera Armenia an tum tumin Ronaldo a inlan lo a, match hnih dang hremna a la neih chu kum khat an enthlak chhunga khati ang bawka a ‘foul’ nawn leh chauhin an tinung dawn a, chuvangin, Ronaldo hian a kumkhaw elpui kumhlun Lionel Messi rualin nakkum nipui thawt laia United States, Mexico leh Canada ramte inthlentawm tur World Cup-ah hian phuar lohin bul a tan thei dawn ta a ni.
Zawhna awm thei kan han tarlan tak ang khan nakkum World Cup khelh chungchangah Fifa hian Ronaldo lakah ‘special treatment’ a pe bik ta mai em ni? Fifa hian Ronaldo chunga hremna hlip turin ‘right’ a nei chiah em tih leh a chunga Fifa zahngaihna lantir ang kha tunhma lamin midang chungah a lo thlentir tawh reng em tih hi chhui zui lawk dawn ila.
Chhanna khaikhawmna hmasa chu ‘yes’ tih a ni ang.
Fifa disciplinary code hnuaia thubelh (clause) pakhatah chuan Fifa-in awm a tih phawt chuan eng hremna pawh a paihthen theiin, a cancel thei tih tarlan a ni.
He mi chungchanga Fifa thuneihna hi Article 25 leh Article 27-ah chiang taka tarlan niin, World Cup finals meuh hi chu player khel pha zawng zawngte career hriltu lian a nih miau avangin he dan hnuaiah hian Fifa chuan hremnain a thatpui dan tur leh eng tiat chiahin nge nghawng a neih theih dan tur tih ngaihtuaha thutlukna siam thei turin zalenna a nei a; World Cup-a harsatna nei tura ngaih player engemawzat hremna pawh vaikiansak an lo ni tawh nghe nghe a ni.
Ronaldo chunga zahngaihna lantir ang diak diak kha ni lo mah se Fifa hnuaia tournament pawimawh ber khel tur player hrem tuarte chungah Fifa hian lainatna lantir a insum lutuk lo a, star player ni pha lem lote lakah pawh ngilneihna a lo lantir fo tawh a ni.
2014 World Cup khel tur zawnna hmawr an bawk hnaih tawh lam kum 2014 khan France defender Laurent Koscielny chu World Cup play-off first leg-ah Ukraine player Oleksandr Kucher a ben avangin hnawhchhuah a ni a, Ronaldo ang bawkin Koscielny kha automatic-in an ram final qualifying fixture khel thei lo tura hrem nghal a ni.
Fifa chuan a han ngaihtuah a, World Cup khel chho mai tawh tur a nih avangin Arsenal centre-back laka hremna chu match khat aia tam a belhchhahsak duh ta lo a ni.
Croatia star Mario Mandzukic pawh play-off second leg-a Iceland an hneh tumin serious foul play vanga hnawhchhuah a nih manah 2014 finals-ah khan Croatia match hmasa pahnih khel thei lo tur a nih laiin Fifa chuan game khat atan chauh hremna a pe a, an match hnihnaa Cameroon laka 4-0 hnehna an chan tumin khelmual a lut thei tan a, goal hnih a khung nghal thawt nghe nghe!
2006 World Cup qualifying tawp lamah khan Netherlands midfielder Phillip Cocu pawh Albania player nghawka puh a nih avangin hnawhchhuah a ni a,
Fifa chuan match hnih chauh hremna pein, Uefa qualifiers-a an match hnuhnung pahniha Czech Republic leh Macedonia an tum tumin hremna a tuar tlingtla a, Cocu chuan harsatna nei loin World Cup-a an ram opening match a khelh theih phah.
Japanese Makoto Hasebe pawh 2010 World Cup qualifying tawpnaah ‘elbow’ avang bawkin red card pek a ni a, Cocu ang thoin match hnih hrem a ni a, ani kha chu a vanduai ta deuh a, hrem match hnihna kha an World Cup game hmasaber a ni thung.
Chuti ang thoin, Iran player Saeid Ezatolahi chu qualifier match hnuhnungber dawttuah hnawhchhuah niin, Fifa lamin match thum em em hremna pe bik loin match hnihah a rehbunsak a, 2018 World Cup-ah match khat chiah a ‘miss’.
Kum 2002 daih tawh khan Mexico midfielder Jesus Arellano chu Costa Rica an tum tuma a tharum thawh tuarin ‘three-match ban’ awrh chungin a thu kun nghiai hman a, mahse, ani pawh khan Fifa zahngaihna bawk dawngin, an final qualifier-a Honduras a hmachhawn ve thei ta lo tih loh World Cup tak taka an ram match hmasa pahnih chu a khel thei ta tho a ni.
Mexico hlawhtlin hun erawh kha chu a tepter tawh hle thung bakah a suala an sual chhuah niin, an player chunga hremna kha ‘lutuk deuh’ tiin an khinglet a, World Cup tak tak inkhel hmasaber an tan dawnah Fifa thutlukna hriattir an ni chauh a, an rilru hah hun chhung a rei ta deuh bik a ni!