Ronaldo Portugal red card hmasaber boruak a lian!

Ronaldo Portugal red card hmasaber boruak a lian!
International football-a goal khung hnem ber ni chungin Portugal captain Cristiano Ronaldo hian ram tana a khelhna lamah tunhmain red card a lo la chawi ngai reng reng lo a, Ningani Dublin khaw World Cup qualifying match-a sihnih faia mualneitu Republic of Ireland an hneh loh tum erawh chuan second half minute 58-ah hnawhchhuah niin, international match 226 khelha red card a chawi tum khatna a ni.
A kiu hmanga Ireland defender Dara O’Shea hnungzanga a nghawk avangin Ronaldo kha a tirah yellow card pek phawt niin, pitch-side monitor kaltlanga video assistant referee-in a endik hnuah referee Glenn Nyberg chuan hremna chu red card-ah a tisang leh ta zawk a ni.
Inkhelh banah Portugal manager Roberto Martinez chuan a captain Cristiano Ronaldo red card kha lutuk deuha a hriat thu leh a foul dan nena inphu tawk lo niin a sawi.
Amah bawrtu chanchinbumite hmaah Martinez chuan, “A mah mah deuhin ka hria a, a chhan pawh team care em em thin a ni a; minute 60 dawn thaw thang kha box chhungah pawhbeh, kuah leh nam a hlawh a, amah che thei loa siam tumtu defender laka a tum ber pawh kha eng dang ni loin tlanchhiatsan a ni.
“Ronaldo laka thununna leh hremna tla kha a chet dan nen a inphu lo a, nghawk (elbow) pawh niin ka ngai lo a, a taksa pumin a va nawk zawk ni maiin ka hmu a, camera kil dang atangin elbow hmuhin an lo hmute pawh chu a ni mai thei a, engpawhnise, kan pawm mai a ngai ang,” tiin khinlet an tum loh thu a sawi chiang nghal.
Team pahnih hi thla hmasa mai khan Lisbon khawpuiah intum tawhin, tah khan sikhat faiin mualneitu Portugal an chak a, kha mi tuma Ireland manager Heimir Hallgrimsson-a’n Ronaldo a sawi dan kha a pawm loh thu leh Ronaldo kha referee-te thunun chi a nih loh thu a sawi.
Home-a an hneh tawh Irish-ho laka an tlawm leh tak rih avangin Portugal khan Group F hma la hruai tho mah se nakkum World Cup khel turin an dinhmun an la sawhnghet zo ta lo a, an group-a pahnihna Hungary lakah point hniha la sangin, goal difference an nei chhah hle bawk a; tun dinhmunah la tlang zo lo mah se playoff khel pha zingah an tel ta phawt a ni.
Pathianni final round-ah Portugal hian team khawng lem lo tura ngaih Armenia an mikhual dawn a, Ireland hian anmahni ang bawka chak mamawh ve ngawih ngawih dang Hungary an luhkhung ve thung ang.
Ti chuan, Ronaldo red card hian eng tiatin nge a thawh dawn a la hriat mai loh a, chiang banga sawi theih chu Pathianni game pawimawhah a inlan thei dawn lo.
A chet dan kha an han zirchiang leh ang a, tharum thawhna (violent conduct) anga chhiar a nih chuan match hum hremna pek theih a ni dawn a, chuti a nih chuan nakkum tournament lian khel turin an ram chu lo tling pawh ni se World Cup campaign bul a tan thei lo mai thei!
Pathianni final qualifier-a an tum tur Armenia hi away team-te an ni a, an hneh mai a rinawm a, engtin emaw lo tlang zo lo thut ni se play-off lamah pawh Portugal hian an captain an chhawr thei lo mai thei bawk!
Fifa inthununna dan (disciplinary code) chapter two, Article 14(i) tarlan dan chuan: “Player-te leh official-te chu a hnuaia tarlan ang hian hrem theih an ni ang:
“Lehlam pawl tihnat – nghawk, hnek, chhuih, seh, chil chhak khum emaw kut thlak emaw hmanga tharum tawhte.”
Tarlan tak angin, Ronaldo hi match thum hremna pek a nih chuan nakkum nipui thawt laia North America khawmualpuia World Cup hi Portugal-in an khel pha a nih pawhin group game hmasa pahnihah bench atanga a pawlte inkhel a thlir mai a ngaih hmel!
Hei hi a dinhmun tur a nih avangin Portugal hian naktuk zanah Armenia hneh lo se, play-off lamah an captain hian tah chuan hremna lo tuar tan zawk se a fuh hial mai thei!
A dinhmun hi disciplinary committee lamin an rel dawn a, an thutlukna a zirin football superstar hmalam hun hi a danglam bawih thei dawn niin a lang!
A chhan pawh – tunhnaia CNN-in an kawmnaah Ronaldo hian nakkum World Cup khel tura Portugal an tling leh a nih chuan chu bak ram tana inlan a tum tawh loh thu leh a football career hrim hrim pawh US, Canada leh Mexico-te inthlentawm tur World Cup hnu lama chhunzawm a tum tawh loh thu a sawi a, match thum hremna pek ni se, a tel loin Portugal hi an talbuai thut thei a, nakkum tournament an khel ngei ngei dawn tih a la chian bik miau loh avangin tling lo ve thut thei reng an la ni a, tum aia hmain Ronaldo hi Dublin red card avang khan kan thlahliam pawh a ngai thut mai thei!