Ronaldo zawm turin Mane inpuchhuak ve leh

Ronaldo zawm turin Mane inpuchhuak ve leh
Nitin, thlatin, kumtin an pung zel tih ang deuh khan Saudi Pro League chuan mikhual hmel thar langsar a neih belh leh ta a, Liverpool forward hlui Sadio Mane chuan Saudi Arabian club Al-Nassr lama Cristiano Ronaldo zawm turin Bayern Munich a chhuahsan fel ve leh ta.
Kum 31 mi hi Bavarians a zawm hlim khan khel tha nghal mai mah se game 38-ah goal 12 chiah a thunsak tling a, Munich khuaa a tuitlak zui tak vak loh avang leh a team-mate nena an inbakkaih bawk avangte pawh a ni mai thei a, sum tam zawk hlawh turin Arab ram pan a titlu ve ta niin a lang.
Tarlan tawh thin angin, Champions League game-a Manchester City an hneh loh tum khan inthlakna pindanah Senegal player hi Leroy Sane nen tharumin an inti-buai a, hrem a hlawh phah hial a nih kha.
Media lam tarlan danin, German champion hian kum khat liamtaa Liverpool hnena an sum senral pound maktaduai 35 kha Saudi club lakah hian an hmulet leh dawn a, a man zat tak erawh he thu buatsaih lai thleng hian tarlan a ni rih lo.
Bayern CEO Jan-Christian Dreesen sawi danin,Southampton player hlui hian kum li chhung atan Al-Nassr a zawm a; Anfield atanga Bundesliga a pan hnu khan Germany ramah kum awlai lo tak a hmangliam tih a tarlang tel.
Bayern manager Thomas Tuchel pawhin amah leh Mane chuan player hatsatna sukiang tura chhuah chu kawng tha berah an ngai tih a sawichhuak ve tawh bawk.
Al-Nassr hian nikum December thla khan Ballon d’Or vawinga dawng tawh Ronaldo senglutin, kumin nipui insuan hun lai hian Croatia midfielder Marcelo Brozovic, Brazil full-back Alex Telles leh Ivory Coast midfielder Seko Fofana an senglut fel leh tawh a, tunah Mane chu contract an ziahpui leh ta a ni.