Rooftop project kalpuina atan State Solar Policy 2025 duang
Mizoram sawrkar chuan solar policy a duangfel tawh a. He policy hnuaiah hian mimal leh sawrkar bakah industry building chunga roof top solar project nasa taka kalpui a ni dawn.
Mizoram Solar Policy 2025 hi Power & Electricity minister F Rodingliana chuan Ningani khan a tlangzarh a. Kawlphetha lama intodelh chu ZPM sawrkar policy a nih angin, solar power hmanga kawlphetha tharchhuah tihpunnan solar policy thar neih a pawimawh tih a sawi a. He policy tharah hian private entrepreneur leh private developer tan solar power plant siam kawnga investment an tih theihna kawng zau tak hawn niin, hei hian mimal eizawnna kawng a hawnsak dawn tih a sawi a ni.
Solar policy thar hian Solar Power Policy of Mizoram 2017 a luahlan a. He policy thar hi kumin February 13 khan Council of Ministers-in a pawmpui hnuah, Mizoram sawrkar hian February 25 khan hriattirna a tichhuak a ni.
Kawlphetha mamawh pung zel siam chhuah vanga khawvel boruak bawlhhlawh tiziaawm turin Mizoram sawrkar chuan ruahmanna – Solar Policy 2025 hi a duang a, hma pawh nasa takin a la mek tih sawi a ni.
Solar policy thar hnuaiah hian mimal leh sawrkar bakah industry building chunga roof top solar project nasa taka kalpuina tur duan a ni a. PM Suryaghar hnuaiah central-in subsidy a pek bak Mizoram sawrkarin subsidy tha tak a pe a ni. He scheme hnuaiah hian building neituin in chunga solar dahna tur capital investment a neih loh pawhin 3rd party-in an dah sak ang. 3rd party leh building neitu hian inremna siamin an solar energy siam chhuah chu P&E department-ah an hralh anga, a hlawkna chu building neitu leh 3rd party inremna azirin an insem ang.
Vankal-ah 20MWp siam thei solar park siam a ni a, a tul dan anga solar park siam kawnga hma lak tum a ni bawk.
Solar Policy 2025 tum langsar zual:
8 Mizoram chu sawrkar investor-te tana sum invest chakawm taka a nih theihna tur hmuna siam
8 India ram puma 100GWp (giga watt peak) siam chhuah tum kawnga thawhhlawk tak state ni ve tura tan lak
8 Technology thar promote-tu ni tur leh solar power generation-a hmasawn zelna kawnga hma latu lian tak nih
8 Kum 2030-ah solar atanga 270MWp thar chhuah hman tum. Kum 2030-ah chuan Mizoram power hmanral atanga zaa 40 chu renewable energy atanga thar chhuah, renewable energy zinga zaa 75 chu solar atanga tharchhuah.