Rotary Club-in digital learning kit hlan

Rotary Club-in digital learning kit hlan
Rotary Club of Aizawl, Rotary Club of Pune Far East leh Suttatti Enterprises Ltd tangho chuan, corporate social responsibility (CSR) hnuaia zirna tihhmasawnna hmanrua “Saksham eLearning Project” hmangin Mizorama sikul 10 hnenah smart TV hmanga zirtirna ‘e-Learning Kit’ chu Nilaini khan an sem.
Hmanpuitu School Education minister Dr Vanlalthlana chuan, sikul 10 hnena Saksham eLearning Kit pek an ni chu lawmawm a tih thu a sawi a. Thingtlang school te bera sikul naupangte pawhin khawpuia zirlaite ang bawkin zirna tha an mamawh a, Rotary Club-in hetiang hmanrua a pe hi a lawmawm a, naupangte pawhin hma an sawn phah ngei a beisei tih a sawi.
“IT khawvelah kan hnufual thiang loa, hemi atana school engemawzat tana hmasawnna tur hmanrua pek an nih a lawmawm hle,” a ti.
He hmalakna hi tunlai thiamna thar hmanga zirna changtlung leh tha zawk chhawpchhuahna tura ruahman a ni a. Saksham unit tinah hian class 1 atanga class 10 zirlai huamin, software nena thlunzawm 43-inch smart TV pakhat a awm a, mamawh dan anga upgrade zel theih a nih avangin, zirna sang zawkah pawh a chhawm chhoh theih dawn a ni.
“Saksham eLearning Project” hi ri leh thlalak (audio- visual) hmanga zirtirna awlsam leh changkang zawk, sikul curriculum nena inmil sia duan a ni a. He project hi zirtirtu leh hmanrua indaihlohna sikul tan thawh hlawk bik tura beisei a ni.
Sikul dawngtute chu – Govt Nepali Primary School Khatla, Govt Gairigaon Primary School Dinthar, Residential School for Privileged Children Luangmual (Mizoram Hmeithai Association enkawl), Govt Chaltlang Middle School Chaltlang, Govt Nepali Primary School Rangvamual, Govt Middle School Chawlhhmun, Govt Gorkha Primary School Zotlang, Helen Lowry School Seventh Day Tlang Vaivakawn, Govt Nepali Middle School Khatla, Govt Primary School Chawnpui
Rotary Club hian Mizoram-a sikul leh khawsak harsa zawk hoah an mamawh ang ngaihtuahin hma lak zel an tum tih an sawi bawk.