Round 3 lut zingah Krejcikova leh Swiatek

Round 3 lut zingah Krejcikova leh Swiatek
Ningani khan Czech Republic star Barbora Krejcikova chuan second round match pakhata a tumpui American Caroline Dolehide laka 6-4, 3-6, 6-2 hnehna changin Wimbledon women’s singles title a kawl lai humhim turin hma a sawn leh hret.
Court Two lama hnehna a chan leh hnuah 17th seed Czech hian third round lamah 10th seed Emma Navarro a hmachhawn zui leh dawn a, fiahna hautak zawk a ni ngei ang.
Second round match dangah grass-court lama chetthat harsat Iga Swiatek pawhin set khat bawk hloh chungin American player dang Caty McNally lakah 5-7, 6-2, 6-1 hnehna a sualchhuak a, third round lama a tum leh tur pawh American bawk Danielle Collins a ni.
Pole lakah World No. 208 McNally khan set khatna a la a, five-times Grand Slam champion Swiatek tan All England Club-a a zinkawng a tawp leh mai dawn emaw tih hman mai a awl a; mahse, set hnuhnung pahnihah erawh a talbuai zui duh ta lo a, awlsam taka set la zawnin, quarter-final stage a la pelh ngai lohna Wimbledon-ah tun thleng chuan a la dam zel phawt a!
Grass-court Grand Slam third round lut zingah Kazakhstan player kum 26 mi Elena Rybakina pawh telin, Greek World No. 3 hlui Maria Sakkari lakah 2022 Wimbledon champion hian 6-3, 6-1 hnehna changin, Denmark player 23rd-seeded Clara Tauson leh Russian Anna Kalinskaya inkhela chak zawk zawk a hmachhawn leh ang.
Russian seventh seed Mirra Andreeva pawhin Italian kum 26 mi Lucia Bronzetti laka 6-1, 7-6(4) hnehna sualchhuak chungin third round a lut a; tleirawl kum 18 mi hian hnehna a chan hnuah a coach leh Wimbledon champion hlui ni bawk Conchita Martinez lakah a thawhrim em avangin lawmthu a sawi.