RRF notification thiahna order Supreme Court-in a suspend

auhati High Court-in Mizoram lui humhalhna dan, Riverine Reserve Forest (RRF notification) thiat tura a tih tawh chu Supreme Court-in a stay/ suspend.Kum 2021 January 21 khan Gauhati High Court Aizawl Bench-in RRF notification hi a thiat a. Hei hian sawrkarin reserve forest a neihte khawih chhiat theihna a nih avangin mi thahnemngaite chuan Supreme Court-ah High Court thupek hi an khinglet a. Kumin April 24 khan ngaihtuah tanin, July 24 Mizoram lui humhalhna dan RRF notification thiah hian Mizoram state ecology a nghawng theih avangin Gauhati High Court thuchhuak hi hman zui loh turin a dah rih a ni.
RRF notification tobul:
RRF Notification 1965 hi a hun laia thuneitu, Mizo District Council chuan Section 14 & 21 of Mizo District (Forest) Act 1955-in thuneihna a pek angin a tichhuak a, final notification hi 1965 January 28-a tih chhuah a ni.
Reserve Forest-te hi Mizoram hun tawn mil zelin dan anga tih fel ngaite tifelin, union territory leh state nih hnu ah chhawm (adopt) zel a ni a. He dan hi Mizoram leilung humhalhna atan tangkai taka hman thin niin, tun thlenga Mizoramin ‘rizap ram’ tha a neih theih chhan pawimawh ber a ni.
He notification-in ‘reserve forest’ a puan hi ramhnuai (forest) chin chauh a ni a, mihring chenna leh khawsakna hmun a tel lo.
RRF notification thiah tum:
July 1998-a Tuirial Hydro Electric Power Project hna chu Riverine Reserve Forest (RRF) chhunga thawh tan a nih atangin RRF chhungah diklo takin ram pass siamin, compensation claim-na atan hman tan a ni.
He compensation claim dan dik lo hi compensation petu lamin an hriat chhuah avang leh Tuirial Crop Compensation Claimant Association intiten pe tura na taka an nawr zel avangin, project work zaa 30 leh design and engineering works zaa 95 zawh tawh hnuah Tuirial HEP hna kal lai chu June 2004 khan tawpsan a ni.
Kum 2008-ah RRF notification tan chhanin rizap rama compensation claim dan dik lo chu hailan a ni a. Mizoram sawrkar chuan rizap chhunga ram cancel-na thupek tichhuakin, Tuirial HEP hna chawl tawh pawh chhunzawm lehin peihfel a ni a; 2017 December 16 khan Prime minister Narendra Modi chu hawntir a ni.
RRF notification thiah thu:
Kum 2018 khan dik lo taka compensation beiseitute hian thar thawh lehin, Gauhati High Court chuan Mizoram lui humhalhna dan – RRF notification chu a hnawl (set aside and quashed) a, chumi rual chuan Tuirial chhunga compensation claim-tute hnena compensation pe turin thuthlukna a siam bawk.
Mizoram sawrkar anga khin let (appeal) tumna a awm mai loh avangin mi thahnemngaiten an nawr hnu ah sawrkar hian khinletna a thehlut a. Puangzar lem loin appeal-na hi sawrkar hian a hnuk dawk leh a, case tihtawp a nihna thupek pawh 2022 November 9-ah Court-in a ti chhuak a ni.
Mizoram sawrkar hian reserve forest nuaibo tumna nem nghet tur zawng nia ngaihin leh compensation pek dan tur ruahmanna siam turin 2021 April 14 khan executive order thar a chhuah bakah RRF notification nuaibo tumna nemnghet tur zawng bawkin The Mizoram (Protection of Rivers) Ordinance 2023 chu Forest department ni lo, PHE department hnuaia duan niin, 2023 August 23 khan State Legislative Assembly-a putluh a, pass a ni.
RRF notification nei let tura beih thu:
2024 February 3 khan chief leh official-ten cabinet thutkhawma pass turin Riverine Reserve Forest & Roadside Reserve Forest chungchang an ngaihtuah a. Hemi hma hian thil inmung hi hriain Centre for Environment and Social Justice (CESJ) Mizoram chuan chief minister hnenah RRF chungchang zirchianna hrang hrang an neih an thlen tawh kumin January 31 khan thehlut nawnin, Mizoram sawrkar pawhin theihtawp a chhuah chhunzawm tih CESJ hian an sawi.
RRF notification neih let leh theihna tura Supreme Court-a petition thehluttu mi 5 chu – Vanramchhuangi (Chaltlang), VL Hrima (Mission Veng), Romalsawma (Mission Vengthlang), Rongura Hrahsel (Mission Vengthlang) leh Dr Lalbiakmawia Ngente (Bungkawn) te an ni.