Rs 24,000 croreTribal welfare scheme
Prime Minister Narendra Modi chuan India rama tribal te tihhmasawnna turin Nilaini hian Centre chuan Rs 24,000 crore scheme a kalpui tan dawn tiin a sawi.
Thawhlehnia Betul district-a public meeting a neihnaah PM Modi chuan puangin November 17-a Madhya Pradesh inthlanna neih turah BJP ten chakna an chan tur thu a sawi bawk a.
PM Modi chuan Madhya Pradesh mipui ten BJP-a rinna an nghahna leh an ngainatna a hmuh thu sawiin Congress te chuan inthlan hmain hneha an awm ringsain an pawm der tawh a ti bawk.
“Naktuk hi Janjatiya Gaurav Diwas a ni a, Jharkhand-ah tribal icon Bhagwan Birsa Munda zahna hlan turin ka kal ang a. Ram pumin Bhagwan Birsa Munda jayanti an hmang ang a, Centre chuan tribal welfare scheme Rs 24,000 crore senna tur a kalpui ang” tiin PM chuan a sawi bawk.
Congress te chuan an chak dawn lo tih an inhre lawk tawh tia sawiin, “Congress te hian an thutiam der te chu Modi guarantees lakah engmah a ni dawn lo tih an chiang a ni,” tiin PM chuan a sawi.
“November 17 kan hnaih telh telh a, Congress te an hniam tial tial a. Congress te chuan an chak dawn lo tih an chiang tawh a ni,” a ti.
Congress te chuan Jammu and Kashmir a Article 370 nuaibo te kha an duh ngai lo va, triple talaq laka dan siam te leh Ram temple sak te chu thleng ngai lo turah an ngai bawk, tia sawiin PM Modi chuan ‘Heng thil tin hi kan ti vek si a ni’ tiin a sawi.
Mipuite hnena kan thil tiam tinreng tihhlawhtlin vekin a awm ang chu chu ka thutiam a ni, tiin a sawi bawk a.
PM Modi chuan India chu khawvela mobile phone siam chhuah tamna ber ram pahnihna a ni tawh a ti bawk.
Congress president ni thin Rahul Gandhi an thawhtannia rally a neihnaa mipui te iptea a phone te chu ‘Made in China’ tih vek a ni a, ‘Made in Madhya Pradesh’ a ni tur a ni a tih chu a chhang let a.
“Niminah Congress atanga ‘mahagyani’ chuan India mipuite chuan ‘made in China’ phone an hmang a ti a. Khawvel khawiah nge an chen a. Ram hmasawnna hmuh theihlohna natna an vei a ni. India chu khawvela mobile phone siamchhuak hnem ber pahnihna a ni tawh” tiin PM chuan a sawi bawk.
PM Modi chuan Congress leader thenkhatte chu ‘in ah an thu tawp a’ tia sawiin pawna chhuah pawh an duh lo a ti bawk a.
“Congress leader te hian mipui te hnena sawi tur pawh an hre lo. Congress te hian an thutiam der te chu Modi guarantee lakah engmah a ni lo tih an hria a ni,” a ti bawk a. “Congress awmna apiangah chhiatna a thleng,” tiin PM Modi chuan a sawi bawk.