RTI dan hmanga zawhna zawttu 98% SPIO chhan danah lungawi

Kum 2006 atanga Mizorama Right to Information Act 2005 hman a nih atanga tun thlengin zawhna zawttu zinga zaa 98 chu state public information officer chhan danah an lungawi tih sawi a ni. Nilaini khan RTI Week 2025 hman a ni a. Mizoram State chief information commissioner John Neihlaia sawi danin, kum 2006-a Mizoram Information Commission din a nih atanga kum 19 chhungin complaint 171 an dawng tawh a, case pending pakhatmah a awm lo.
Hemi hun chhung hian RTI hmanga zawhna diltu 45000 chuang awmin, zaa 98 chu SPIO chhannaah an lungawi a. Heng zinga 730 (2%) hi SPIO chhan dana lungawi lo, thuneitu sang zawk – first appellate authority (department appellate authority) hnena zualko an ni a; chuta la lungawi lo 257 (35% of 730) chauh second appellate authority (CIC) hnena zualko an awm a ni.
December 2023 atangin hmunhlaa awm leh hna avanga buaite tan hybirid hearing /online hearing kalpui a ni a, kum 2023-ah village/ local council-te chu RTI zawhna dawng thei tur public authority atana ruat tan an ni bawk.
2022 July 1 atangin Mizoramah RTI online-a kalpui a ni a. Kumin October 7 thleng khan online-a dilna 22078 lut tawhin, chawhrualin nitin zawhna 18.5 lut ang a ni. Kumin bikah nitin zawhna 23.6 leh October thla bikah nitin zawhna 31 zel lut anga chhut a ni.
Week hmanpuitu larsap Gen. Vijay Kumar Singh (Retd) chuan RTI Act chu mipui tha tichaka thuneihna petu a ni a, midang chhaih buaina atan hmansual a rem lo tih a sawi a. Mipui rawngbawlna lam hawi ni lo, hun leh tha khawhralna atan hmang lo turin mipui a chah. Sawrkar hnathawkte pawh RTI Act-in a phut angin mawhphurhna an hlen zel a tul tih sawiin, an nitin hna thawk thei lo khawpa RTI hmanga harsatna siamsak erawh ven a tul tih a sawi.
“Thil tha zawk a awm theihnan RTI Act hman tangkai a tul a, inepa inhuat phahna atana hman erawh pumpelh a tul. Sawrkar leh mipui inkara rinawmna, tha taka hna thawk thei tura insiamna leh inrintawnna chawilarna atana hman tur a ni,” a ti.
Mizoramah sum hmuhna atan leh mahni hmasial taka RTI Act hmangsual an awm lo nia a hriat thu leh chhuanawm a tih thu larsap hian a sawi a ni.
Mizoram Information Commission hmalakna fakawm a tih thu a sawi a. India rama RTI online kalpui hmasa 8-na a ni leh complaint an dawn a chingfel nghal zelte, RTI inzirtirna zau taka a kalpuite, kumtin report mumal tak a tichhuak ziah thin leh department website uluk taka a vil thin chu lawmawm a tih thu a sawi.