RTI lawmman…
Mizoram Information Commission chuan Right to Information (RTI) Week, 2025 lawmna October ni 8-a neih tur pualin RTI Act, 2005 hnuaia Section 4(l)(b) in a phut angin public authorities/departments/offices-ten suo motu disclosure an website-ah an ti tha em tih a enfiah leh dawn a; provision zawm thate thlang chhuakin lawmman a pe leh dawn a. Suo motu disclosure an website-a ti tha lote pawh puanzar a ni dawn bawk.
Nikum kum tir lama Chief Inforamtion Commissioner-in chanchinbumite a kawmnaah khan Mizorama Information Commission a din tirh atanga 2024 January thlenga RTI hmanga zawhna lut chu 20,000 chuang a nih thu leh, zawhna chhan loh leh chhan that loh avanga second appeal 136 leh complaint 157 a lut tawh a; zualkona leh vuivaina lut hi 2% vel a ni, tiin a sawi a. SPIO leh DDA ten hna an thawk tha thawkhat viau nia a sawi rualin an hna thawk tha duh lo SPIO pathum chu dan hnuaiah hremin sum chawitir an nih thu a sawi a. Hei bakah hian sawrkar department thenkhat, website lama suo motu disclosure ti tha lote pawh ko khawmin an tihturte an hrilhfiah tih a sawi bawk a ni.
A nihna takah chuan, danin ti tura a tih apiang chu sawrkar department-in a zawm mai tur a ni a, chutiang pawh ti tha duh lo, sawrkar dan zawm duh lo, CIC koh khawm hial ngaia department thenkhat an awm hi a zia lo hle.
Tunhma deuha Aizawl khawpui chhunga tui sem dan, a mumal loh deuh avanga mipui phunnawina ri a rin deuh lai khan, a kaihhnawih thuneitute lam chuan tuisemtute thathona tur a nih ringin ‘tui sem tha lawmman’ kha siam an rilruk deuh a. Tui semtute hi hlawh neia sawrkarin a rawihte an ni a, an hna kha tha taka thawk tura beisei an ni. Beisei anga an thawk tha lo a nih chuan thuneituten action an la mai tur a nih laiin, tlawn deuh titiha a lawmman siamsak zawnga hlawhfa rawihte thlem lungawi tumna ang ziazanga thil kha ngaih theih a nih avangin lawmman siam kha an puitlin ta chiah lo niin a lang.
RTI chungchangah pawh hian, department ti thate hnenah lawmman siam a ni ta hial a, lawmman siam hi tih theih chuan a sual hauh lo, a tha tho e; mahse, lawmman siam hi a ti tha duh lote thathona tura thlem chhuah tumna hmanrua te hi a ni mai ang em tih te pawh a ngaihtuah theih awm e.
Thil pakhat, information bank lam pawh hi vei tham a awmin a lang. RTI hmanga zawhna chhan chhung a rei lutuk thin hi, sawrkar department-te hian ‘inforamtion bank’ (data record) an nei chau hle tihna a ni ber a. Tun lai khawvel, digital era-ah hi chuan, han ‘click’ zeuha print chhuah nghal zung zung theih tura record vawn fel theih a ni tawh. ‘Information Bank’ neih that te hi inelnan hmang thei zawk se a tha phian maithei a ni.