Ruah a sur zeuh zeuh, mahse a tam

Kuminah ruah a tlem tiin a sawi theih a, a tam phian mai a tih theih bawk. A sur zeuh zeuh chauh a, mahse a sur chhunah a tam.
State Meteorological Centre-in an chhinchhiah danin kuminah ni 10 chauh ruah a la sur; a zur zeuh zeuh chauh a, a sur har bawk.
Mizoramah chuan ruah hi thla tin a sur tiin a sawi theih a, kuminah chuan January leh February-ah a sur lo. March-ah pawh a sur har a, kumina ruah hmasa ber hi March ni 18-a mi a ni chauh. Hemi ni hian ruah tui mm 1.8 a tla a, March thla ni dangah a sur lo.
March ni 18-a tlem azawng a sur hnuah a chawl vang vang a, April ni 7-ah a sur leh chauh. April-ah pawh a sur zing lo, ni kua a sur a, March-a mi nen kuminah ni 10 chauh ruah a la sur.
Ruah a sur zing lo na a, a sur chhunah a tam phian zel; March ni 18-a mi kha a tlem a, April-ah chuan a tla deuh tlawrh zel.
Kuminah April-ah ruah hi vawi kua chauh a sur a, mahse State Meteorological Centre chhinchhiah danin April thla puma ruah sur hi mm 128.6 a tling daih. Nikum April-ah mm 87 a tla a, 2023 April-ah mm 98.1, 2022 April-ah mm 23.2, 2021 April-ah mm 85.5 a tla. Kumin April hi tun hnai kum nga chhunga April thlaa ruah a tam ber tum a ni daih, ni kua chauh a sur na a.
Kumina ruah tui tla tawh hi mm 130.4 a ni a, nikum January atanga April thlenga ruah tla zat chu mm 137.8 a ni. Nikumah khan January atangin a sur tan a, mahse April thla thleng kha chuan a tam tlawrh tlawrh thin lo.