Ruah leh thlipui vangin US-in mi pakua thi tawh

Ruah leh thlipui vangin US-in mi pakua thi tawh
Kentucky-ah mipa naupang kum kaw mi chu tui lianin la letin tun hnaia US-a ruah sur nasa kaihhnawihah mi pakua vel thi an awmna a ni ta.
Thli na tak leh ruah tam takin Arkansas, Tennessee leh Kentucky te chu Inrinni thleng khan a la tuam a, mipui chet velna pawh a buai hle.
National Weather Service-a khawchin zirtute chuan Pathianni atangin ruah sur leh khaw lum chu US laili atangin khawchhak vaukam lamah a insawn tawh dawn tih an sawi.
Tui lianin a lak mipa naupang hi an school bus dinnaa Zirtawpni tuka a awm laia a lak a ni a. Frankfort, Kentucky-a Frankfort Police Department chuan a ruang hi darkar hnih hnuah an hmuh thu an sawi.
Franklin County Schools Superintendent Mark Kopp chuan, “He chhiatna thleng hian min thawng hle a, kan zirlai duhawm tak nunna lak a ni hi a lungchhiatthlak tak zet a ni,” a ti.
Kentucky Governor Andy Beshear pawhin pawi a tih thu a sawi a, Inrinni khan Kentucky-ah hian puitling pakhat a thih leh bawk thu as awi.
“Tui hi kan tan hlauhawm a ni rih mek a, tute pawhin kan hmangaihte himna turin hma kan lak a ngai a ni,” a ti.
National Weather Service chuan Pathianni thleng khan thlipui leh ruahpui hi US laili, Arkansas leh Louisiana atanga Pennsylvania khawthlang lam thlenga la thawkin a chak lo zui ang a, khawchhak vaukam a pan dawn niin an sawi.
Khaw awm dan dik lo avang hian Inrinni chawhnu (India-a Pathianni khaw var hma) thleng khan Arkansas, Texas, Missouri leh Oklahoma-a mi 1,62,000-in power an la nei lo va. Mississippi, Tennessee leh Kentucky-ah chuan emergency an lo puang tawh bawk.
Ruah a han hnuah pawh hian luite an la len theih avangin thil a la hlauhawm reng dawn tih khawchin zirtute an sawi.
Thi dang zinga Tennessee-ah pa pakhat leh a fanu tleirawl an tel a. Missouri-ah putar kum 68 mi, a lirtheia tang chu tui lianin a la bawk.