Ruah tla in ramri lam tibuai nghal

Fur intan tur, ruah bawhawk surin ramri lam hmun thenkhat a tibuai nghal a. Tripura nena inkalpawhna Langkaih lui lianin Mizoram lam a nghawng na zual. Thudawn danin Tripura lam Damcherra leh Mizoram lam inkalpawhna Langkai lei thar dawh mekah tunhnaia ruahsur avangin tui a tam a, hnawl tam tak a chhawm a ni. Heng hnawl inhnawh tam hian Kanhmun ram lam khawrhin lui hnaiha awm concrete building pathum vela cheng chu an inthiarchhuak a ni.
Heng building hi chenna atana hman a nih bakah dawr atana hmang an tam a, a khawih buai hi mi/ chhungkua 17 vel lai nia sawi a ni.
Lui tui lian dang tur hian retaining wall siam mek a ni a, la siam zawh loh a nih avangin tunah pawh Kanhmun ram lam hi tui lian thut hian a rawn la hek ta tih thu dawn a ni bawk.
Hetihlai hian tunhnaia ruah surah Assam ramri hnaiha awm Bairabi ah pawh harsatna an tawk a. An ni erawh ruahtui tlak tam lutuk avanga tuilian ni loin, khaw chhunga hume pipe dah chu a kum tela a tlakhniam hret hret avanga harsatna tawk nia sawi niin, chhungkaw 4 vel a nghawng a ni.
He thil hi an kawng siamtu company – Nidhi Infrastructure Pvt Ltd pawh an hrilhhre tawh a, an hnathawh tur china a tel loh avangin an siamsak thei lo niin khawtlang hruaitute an hrilh a ni.
Tunhnai ruahsurah chak lakna kawngpui ber, Silchar kawng, a bikin Khamrang leh Sairang inkar chu truck tan tlan harsa khawpin hmun 20 velah a chhia a, hei pawh hi siamthat tumin contractor lam an inbuatsaih mek a ni.