Ruahtui khawl vanga Rs 500 chawi chungchang kha…

The Aizawl Post chanchinbu July ni 22, 2024 chhuaka editorial “Van ruahtui khawl vangin Rs 500 chawi…” tihah khan, tui meter a vir loh avanga consumer pakhatin tui meter chhia anga tui bill Rs 500 a chawi chu a hriatthiam loh thu tarlan a ni a. Hei hi a kaihhnawih department PHE kalphung a nih chuan, mipuiin zau zawka an hriat a pawimawh thu leh mipui inhrilhhriat kawnga tanlak a ngaih thu editorial-ah khan tarlan a ni a.
Hemi chungchangah hian The Aizawl Post-in PHE Department hnuaia SE Aizawl Circle hnen atanga thu a dawn danin, Tui connection tih tawp lailawk (Temporarily Disconnected) ni lo, tui connection nung lai meter reading hi a ngai reng (a vir lo) a nih chuan meter chhia anga chhiar turin PHED billing system hi siam a lo ni a. Chu chu kan sawi tak consumer hian a hriatthiam loh lai tak chu a ni.
He consumer hian ruahtui khawl taima tura fuihna thu a awih avanga ruahtui a lo dawhkhawl ve ngar ngar laia, a tui meter a vir tir tak loh avanga Rs 500 a chawi mauh mai si kha, PHE billing system a hriat loh vang a ni ve mai a, a thiamawm viau tho awm e.
SE Aizawl Circle-in The Aizawl Post a hrilh dan chuan, Water Supplies (Control) (Amendments) Rules, 2016 (as revised in 15th March, 2023), Rule 7 (25) tlawh chhana billing system hi siam a ni a. Tui meter reading a kal lo emaw, a let emaw a nih chuan chu connection chu meter chhiat hma thla thum bill chawhrual (last three months average) emaw Rs. 500/- emaw, a tam zawk zawk system hian a chawitir mai thin a ni.
Rei tak zin bo dawn vang te, in thiah avangte, ruahtui khawl vang te leh chhan hrang hrang avangin tui connection neituin tui a mamawh loh chang a awm thin a. Hetiang hunah hian Temporary Disconnection dil theih a ni. Tichuan, connection tih tawp lailawk a nih chhung chuan bill a chawi dawn lo a ni.
Tui connection tih tawp lailawk (Temporary disconnection) hi mahni bialtu Sectional Officer hnena hriattirin tih fel mai theih a ni a. Online vekin application kal tawh avangin connection neitu vir buai a ngai lo. Awlsam tein connection hi tih tawp lailawk mai theih a ni a. Chutiang bawkin connection tih nun leh (Reconnection) duh hunah pawh Sectional Officer hnenah bawk kalin, online application a lo thawn sak ang. Awlsam tein connection hi tih nun leh (reconnect) mai theih a ni a. Tui lak loh vanga meter vir lo avanga tui bill chawi hi hetiang hian pumpelh theih a ni.