Ruahtui leh Kan Environment

1. Ruah lo sur hi helam atanga tui hû chho kha hmunsang leh vawt a thlenin a khal a, a khal chu a rit a, a lo tlafual a, lum nen an intawhin tuiah a lo chang a, a lo sûr thin.
Chho tur a tlêm chuan a sûr hi a tlêm dawn tihna a ni.
A sur a tlêm chuan kan lui tui an kang ang a, tui kan mamawh khawp kan nei lo dawn tihna a ni mai.
Tui a tlem chuan tui man a to dawn tihna a ni leh mai a, tui rûk leh hralh rûk te tun aiin a nasa dawn tihna a ni bawk.
Tin, tui thianghlim lo kan khawihin kan in dawn tihna a ni tel a, typhoid leh cholera leh water borne disease te a hluar ang.
Naute leh naupang ten tui avanga natna awm theite an tuar nasa a, naupang natna hrileng a hluar hle thei dawn tihna a ni.
2. Kan ram ngawte hi tui lo chelhkhawmtu an ni a, an awm loh chuan Tuihû chho (evaporation) nasa takin a tlem dawn tihna a nih bakah ruahtui lo sûr te leh leihnuaia hnawng te lo chelhkhawmtu a awm mumal dawn lo va, kan lui te an kang dawn tihna a ni.
In lianpui pui leh sports complex aiin kan mamawh hmasa chu luidunga ramngaw tha a ni.
Ramngaw a that loh chuan lei a ro dawn tihna a ni a, thlai chin a hlawhchham nasa dawn tihna a ni. Chutianga kan ramngaw thiata kan ram leh luidung te kan tihro nasat chuan thlai kan intodelh lo ang a, phai lam kan ring ang, a to chho hle ang a, mi rethei zawkte tan a hreawm belhchhah hle dawn.
Lei a ro chuan leihawng tur thlai a awm lo ang a, mi tam tak eizawnna a tlachhe dawn tihna a ni.
Mizoram hian kan Basic needs leh intermediate needs te uluk taka thliar a kan ngaih pawimawh tur indawt kan rem thiam a ngai hle a ni.
Siamtu pawh hian thilsiam dangte nena inkamkia awm tur hian min duang ni hian a lang a, mahse kan duhâmna leh thlir thui tawk loh avang ten hun rei lo têa nawmna umin hun rei zawk tur atan kan hma lam kan intihreawm ta a ni.
Ram hausa te chuan artificial thil tam tak an siamin an nei a, keini chu kan ni lo.
Khawvel lum zel avangin Aizawlah pawh Cooler leh AC te kan hmang nasa ta viau mai a, chu chu mi tinin kan tlin lem lo. Kan ramngawte leh luidungte a him loh chuan khawvel lum zual zel hian kan chenna mêk khaw thenkhat chu awm ngaihna awm mang lovah min siam dawn a ni.
Kan tu leh faten ‘kan zotlang ram nuam” an tih zui zel theih dawn leh dawn loh hi vawiina thuneitute hmalak danah hian a innghat a ni.
Political Geography-ah chuan Development hi ‘mimal, a huho leh ram pum anga mipui ten hun rei tak chhunga an tangkaipui theih tur hmalakna hi a ni’ tiin an sawifiah a. SDGs ah chuan ‘….. chu hmalakna chu thangthar ten an la hman tangkai ve tur te zuah lova hmalakna a ni tur a ni hauh lo’ tih a belh bawk.
Keini ang ram rethei takin sum lakluhna hnar kan neih remchang zet chu Tourism a ni.
Phai lama awm te khuan boruak dai te hi an mamawh em em a, hahchawlh an châk lutuk. Kan sik leh sa nuam lutuk hian phaia chengte a la hip lut hret hret reng dawn a ni. Mahse, kan lui leh ramngawte kan khawih chhiat chuan tlawhtu kan nei kher lo vang, sumdawnna hmuna min duhtute bâk.
Sawrkar, pawl leh khawtlang tin ten hun rei lo té té a nawmna chauh en mai lo vin, kum 100 la awm tur anga thil thlirin kan tu leh fate tana kan ro hnutchhiah theih hlu ber chu kan lui leh rammgaw te an ni, khawvel awm chhung daih rohlu chu.