Ruang 35 la phum rih lo turin court-in hriattir

Manipur buaina avanga Kuki-Zo mi 35 te ruang phum tumna chu Manipur High Court Bench Acting Chief Justice M.V. Muralidharan kaihhruai chuan August 3 zing lam dar 6 a ngaihtuahna a neihah State leh Central sorkar te chu status quo kengkawh rih tura tiin Churachandpur District-a Haolai Khopi a burial site chu la khawih danglam rih lo turin a ti.
Bench chuan ruang phumna hman tum hmun hi khawih danglam a nih loh nana hma la tura tiin hemi kaihhnawiha inhnamhnawih tin sorkar pawh telin chingfela hma la turin a ti a. Court chuan Kuki-Zo mite pawh karkhat chhunga ruang phumna hmun an neih theih nana thuneitute be fel turin hun a pe bawk.
Hetih lai hian Indigenous Tribal Leaders’ Forum (ILTF) te chuan Ministry of Home Affairs (MHA) leh Home Minister Amit Shah-ah a ngenna angin ni nga chhung atan ruang chu phum rih loh phawt an remtih thu an sawi a. Mizoram Chief Minister pawhin a ngen thu an sawi bawk a. Mahse, ITLF te chuan Shah hnenah lehkha ziak thungin ruang phum an tumna chu ni nga chhunga phalsak an nih loh chuan an phum tho tur thu an sawi thung.
High Court hian August 2 a International Meeteis’ Forum (IMF) tena Public Interest Litigation (PIL) petition an thehluha mitthi phumna hmun tur chu sorkar ram a nih avangin remtih loh tur tia an ngenna chu a ngaihtuah a ni.
Ngenna hi Bench of the Acting Chief Justice hnenah thehluh niin, anin bench of Justice Ahanthem Bimol Singh leh A. Guneshwar Sharma te ngaihtuah turin a ti a. Mahse, Justice Bimol Singh hian mimal thila harsatna a neih a chhuanlam avangin Acting Chief Justice chuan August 3 khan a ngaihtuah ta a ni.
Zing lam dar 5 velah State sorkar lawyer chuan Acting Chief Justice chu a chennaah hmuin a hmanhmawhthlak dan a hrilh a, hei vang hian ngaihtuah chuk chuk tura chhawpchhuahin a awm zui ta a ni. Hearing neihnaah hian State sorkar aiawhin Deputy AG H. Debendra a ding a, Central sorkar aiawhin Deputy Solicitor General of India dingin petitioner aiawhin Advocate M. Hemchandra leh a team te an ding ve thung.
High Court chuan thutlukna a siamah dan leh hrai lekkawhna lama harsatna nasa tak awm thei a nih avangin leh community hnih atanga mitthi phum tumna hmuna mi tam tak punkhawma tharum thawhna thar siam theia thisen chhuahna nasa tak thlen thei a nih avangin thupek siam ngaiah kan ngai a ti a.
Bench chuan Indigenous Tribal Leaders’ Forum leh ruang phum tuma hmalatu Joint Philanthropic Organisations (JPO) te chu August 9 thlenga nghak rih turin a ti ta a ni.
PIL an thehluhah IMF te chuan July thla tawp lam khan mitthi phum tumna kaihhnawihah local authority leh JPO ten meeting an nei tawha inphumna chi ni lo an ti twh an ti a. Deputy Commissioner chuan mitthi phum tumna chu Sericulture Department ram a ni a ti a, Superintendent of Police pawhin mithi phum tumna chu Churanchandpur leh Bishnupur hnaih tak buffer zone a siam mek a nih avangin mihti phumna chuan ‘thenawm district a kangkai theia thil tha lo zawk a thlen thei’ a ti bawk.
Petitioner te chuan mitthi phum tumna chu Sericulture Department ram nasa taka suasam tawh Kuki-Zo mi tena an thenfai tawh a ni ti thungin petitioner te chuan sorkar ram a nih angin community tinte ta a nia hmansual tia sawi theih a ni lo an ti ve thung.
ITLF te chuan official thuchhuak an siam zuiah MHA ngenna chu an ngaihtuah thu sawiin sorkar pawh an demand te tihlawhtling tura an phut thu sawiin Headquarter 27 sector Assam Rifles kaltlangin Home Minister hnenah lehkha an thehluh thu an sawi zui bawk.
Home Minister hnena demand an siamah mitthi phumna tur Haolai Khopi village chu remtihsak tur te, Kuki-Zo te raung Imphal a damdawi in a mithi dahkhawmna hmuna la dah mek te pe tur te leh hill district atanga ‘meitei state forces’ tin te sawn chhuak turte leh Manpur atanga seperate administration siam tur te, Imphal jail atanga tribal tang te chu State dangah him taka sawnchhuak tur tein an phut a ni.