Ruang la hmuh belh lo Sawrkarin ral zawm zel

May 27-28 a ruahsur nasa avanga leiminin in a hnawlnaa nunna chan zing ami 5 chu an ruang hmuh a la ni lo. Hetihlai hian sawrkar chuan nunna chante hnenah ralna a hlan zel.
Ruahsur nasa avanga leiminin in a hnawl zingah nunna chan 34 an awm nia ngaih a ni a, heng zinga 29 hi an ruang hmuh tawh a ni. May 28 (Zirtawpni) kha ruang hmuh hnuhnun ber niin, Central YMA kaihhruaina hnuaiah Inrinni leh Pathianni pawh khan zawn chhunzawm ni mah se, hmuh belh an awm lo nia hriat a ni.
Disaster Management & Rehabilitation minister K.Sapdanga chuan Inrinni khan tunhnaia chhiatna thlenna hmun a tlawh a, he chhiatna avanga nunna chan zingah sawrkarin a la ral loh te a ral chhunzawm bawk.
Aibawka nunna chan, a ruang hmuh tawh Vanlalruali bakah Falkawna he chhiatna avanga nunna chan Lalthanzama leh Hmangaihzuali te unau chhungte hnenah sawrkar atanga ralna hi a hlan. Cheng nuai 4 pek turah nuai 2 zel pe phawtin, a bak nuai 2 hi chu nakina la hlan tur niin chief minister chuan a lo sawi tawh a ni.
“He chhiatnaa ralna kan hlan dan chungchangah sawrkarin a tih tur a rang thei ang bera tanpuina pek a duh avangin hetiang hian hma kan la a, sawrkar hmasa tih dan a nih leh nih loh lam infakna emaw insawiselna emaw, tuartute tan pawha ngaihthlak nuam lo khawpa tawngkam cheh kan awm leh thin hi a pawi ka ti hle. Heng chhiatna thlen avang hian sawrkar hian eng hamthatna mah dawn kan beisei loa, chu chu kan rilru pawh a ni lo. Lusun chhungten harsatna an tawh a rang lama chhawmdawl hi kan duh ber a ni,” DM&R minister hian a ti.
Minister hian Melthum, Hlimen leh Kulikawna chhiatna thlenna hmun a tlawh leh a, khawtlang hruaitute nen harsatna hrang hrang sutkian dan tur sawiho a ni.