Rubber kung tihchhiatna hmun Assam-in an state chhung an ti

Tunhnaia Mamit district Saikhawthlir rama rubber kung phun Assam Police leh Forest miten an tihchhiat chungchangah Thawhtanni khan Bairabi-ah Mamit district leh Hailakandi district thuneitute an inbia.
Mamit district bawrhsap K Laltlawmlova chuan an district chu reserved forest huamchhunga awm a ni a, district mipuiin reserved forest hmang tangkai turin dikna chanvo tam tak an nei tih a sawi. Tunhnaia Assam Police leh Forest department-in Saikhawthlir khaw bula rubber kung phun an tichhiatna hmun chu Kawrthar Forest Division hnuaia awm a nih angin GIS Cell, EF&CC department Mizoram-in map a siam chhungah a tel tih a sawi bawk.
Hailakandi district bawrhsap Abhishek Jain chuan tunhnaia Saikhawthlir khaw bula rubber chingtuten buaina an tawhna hmun chu state ramri chungchanga buaina a ni loa, reserve forest huamchhunga plantation kalpui vang zawka thleng a ni tih a sawi a. Helai hmun hi Inner Line Reserve Forest, Gharmura Range Hailakandi district huamchhung, Reserved Forest Act 1980 hnuaia humhalh, he Act-a Section 2A chuan rubber kung leh thildang phun a khap tih sawiin, helai hmuna rubber kung phun tih chhiat chhan a sawifiah. Assam state chhung km.1.5 vela thuiah rubber kung an phun nia sawiin, Forest Conversation Act 1980 kalh a nih theih dan leh National Green Tribunal ngaihmawh tak a tlin theih thu a sawi bawk.
Thutkhawmah hian tha taka buaina chinfel dan tur leh hun lokal zelah pawh buaina dang a thlen nawn tawh lohnan ruahmanna fel zawk siam dan ngaihtuah nise tih a ni a, thuneitu sang zawka thlen nise an ti. District pahnih bawrhsap bakah SP leh Forest lam mite an tel a ni.