Rubiales la inhnukdawk duh lo

Pathianni zan Wo-men’s World Cup final-a lawmman semnaah khaw-vel hmuh laiin Spanish football federation (RFEF) president Luis Rubiales chuan an player lawmman dawng zo chu pawm chung-in a hmuiah a fawhsak ringawt a; kiltin atanga demna thawm a rikchhuah hnuah a hna chelh lai atanga bang tura nawrna hial a tawk a, he thu buatsaih lai thleng hian president a nihna bansan a tum lo!
Tarlan tawh thin angin, kum 46 mi Rubiales hian sikhat faia an ramin England an hneh hnu khan Spain forward Jenni Hermoso hmuiah a fawp siah a; final tawpna hamrik rik ruala a kap a zut lai thlalak leh video a darh bawk!
An president khawsak dan mawi lo tak avangin Spanish football federation chuan inkhawm hmanhmawh (extraordinary general assembly) koin, he hunah hian Rubiales chuan a in resign dawn loh thu vawihnih a sawi nawn a, beihna a tawk mai niin a sawi!
Ningani khan Fifa chuan Spanish football thuneitu sang ber chet danah khan hremna lekkawh a tul em tih chhui hna an tan a, chumi hma Thawhtanni daih tawh khan Rubiales hian an player a fawh ngawt chungchangah thupha chawi bawk mah se a khawsak dan kha ngaihdam dila tlingtlak mai chiah an ngai lo nasa hlawm a, bang tura nawrna hial a tawk zui ta a ni.
Nimina RFEF inkhawm hmanhmawh kohah Luis Rubiales hian Fifa president bakah Spain lalnu Queen Letizia leh a fanu tleirawl kum 16 mite nen Stadium Australia VIP area-a dingho chunga a kapa a thil fun puar a han thawm kual vel avang khan thupha a chawi leh a, mahse, a hna chelh lai atanga ban tumna a neih loh thu sawi chungin a thiam chuti tak maia kawh rawn leh dem rawn a hlawh ta mai chu phu lo a intih thu a sawilang tel fan!
Rubiales hian an pawl inkhawmah a thiamthu sawiin, a chet dan kha hun tawp dawna a penalty pet an dansak avanga Hermoso hnem a tumna niin a sawi!
“Jenni hi min chawisangtu pakhat a ni a, kha penalty kha theihnghilh turin ka hrilh a, ani pawhin ‘OK’ tiin min chhang.
“Kiss khan a zui ta kha a ni a, inhriat-thiamtawnna leh inpawhtawnna chu a ki pui ber a ni. Beihna ka tawh mek hi a tawp thlengin ka beilet dawn,” tiin ban lam a la hawi lo nasa!
Zirtawpniah ban tumna a neih loh thu sawi bawk mah se an la umchhuak nge nge thoin a rinawm a, a hmunruak luah tura sawirik zingah Extremadura football federation president Pedro Rocha leh Andalusia federation head Pablo Lozano-te an langsar.
Rubiales hian football a khelh laiin Spain rama league hniam zawk club lamah hun a hmang ber a; kum 2009 khan Scotland club Hamilton Academical thuam hlipin inkhelh a chawlhsan.
A kumlehah Asso-ciation of Spanish Foot-ballers (AFE) president hna chelh nghalin, kum 2017 khan RFEF president a chuh tur thu a puang a, May 2018-ah chu hna atan chuan thlanchhuah a ni.
President a chuh laia a intiamnate chu RFEF kalphung tihtunlai te, inthlakthleng thlentir leh pawl langtlang zawk dinchhuah tihte a ni a, an president hlui Angel Maria Villar pawh corruption thubuaiah an man zui ta nghe nghe a ni.
A tihthat lam sawi tur awm ve bawk mah se a rorel chhung hian sawi neuh neuhin a khat a ni ber a!
Chu’ng zingah chuan 2018 World Cup-a an match hmasaber an khelh hma ni hnih chiah awm tawhah Spain manager chhawr lai Julen Lopetegui an han ban ngawtte kha telin, Saudi Arabia rama Spanish Super Cup zu khelh that leh an rel tluk chungchangah pawh euro maktaduai tam tak hu inremna ruk awma puhna a tawk bawk.
Nikum September thla pawh khan Spain women’s squad-ah helna chhuakin, player tam zawk chuan an coach ni rei tawh tak Jorge Vilda chu ban an phut a, mahse, RFEF lamin Vilda an thlawp tlat a, Rubiales chuan World Cup squad-a inhmuh-thiamlohnaa inhnamhnawih 15 atangin player 12 a paihchhuak thawt nghe nghe!
Office lamah pawh an president ber hi hnathawk hmeichhiate lakah a ninhlei viau niawmnin thu a thang mek a, staff hmeichhe pakhat pawhin lawmman sem zana Rubiales khawsak duh dan kha thilmak a nih loh thu a sawichhuak niawmin Spanish media lamin an tarlang tha duh hle!