Ruh enkawl nen artui heng

University of Massachusetts Lowell a mithiam ten zirchianna an neih atanga an hmun danin artui heng (artui kâwr) chu ruh tha lo siamthat nan a hman tlak dawn hle niin an sawi. Zirchianna neitute chuan artui heng chu an rawt sawm a, chu chu hydrogel mixture-ah siamin, chumi hmang chuan ruh cell atangin ruh thar a insiam thei niin an sawi.
Artui heng hi calcium in a khat a ni deuh ber a, chu chu ruh cell-in than a mamawh a, ruh tissue-ah a insiam chak a, ruh tliak leh ruh auh te a insiam tha rang bik thin. He technique hi bone graft-ah pawh a tidam chaktu atan a tha niin an sawi.
Mahse, he enchhinna hi laboratory leh sazu-ah chauh la neih a ni a, mihringah a taka hman a la ni lo nain, mithiam te chuan nakin lawkah chuan artui heng hi mihringah pawh ruh tha lo chi hrang hrang enkawl nan hman thuai a nih an rinthu an sawi bawk a ni.
Hetihrual hian hriat tur pawimawh chu, artui heng hi ruh enkawl nan a tha tih sawina hi chu a rei tawh a, hmun thenkhatah artui heng rawt dip a, natural calcium supplement anga ruh enkawl nana lo ei ta mai te pawh an awm a ni awm e. Mahse, hei hi a risky hle tih hriat tur a ni, a chhan chu artui hengah khan bacterium Salmonella enteritidis a lo awm thei a, chu chu kan ei chuan salmonella infections a thlen thei a ni.