Ruih nana hman damdawi chungchang…

Tunhma khan khuh damdawi chi hrang hrang leh nachhawkna damdawi mumte kha thalaiten ruih sual nan an hmang nasa hle a. Hun a lo kal zel a, tun thlenga thalaiten ruih nana an la hman lar tak pakhat chu khuh damdawi – Codeine cough syrup hi a ni.
Tun hnai maiah, CID Crime hnuaia Special Narcotics PS te chuan an thu dawn bawhzuiin Selesihah Codeine bur 597 leh a neitu nia puh mi pakhat an man a. An mi man inpuanna bawhzuiin Ramthar Venga kudam pakhatah Codeine bur 1292 man leh a ni.
Daktawr ten damlo ei tur damdawi an chawhna lehkha (prescription) tel lo chuan damdawi hralh chhuah loh tur tih dan hi a hrechiang ber tur chu damdawi zuartute hi an ni. Hei hi sawrkar chuan tun hnai atang khan a ngai pawimawh zual a, khauh taka dan kenkawh tumin hma a la a, damdawi dawr tinah CCTV dah vek tur tih lamhawi te pawh hriat tur a awm tawh kha.
Tuna Codeine bur heti zat manchhuah tur a awm ta hi, dan lova lo kawltute hian engtia an neih nge, khawi atanga an neih nge, tih hi chhui tel ngai a ni a. Tualchhunga damdawi zuartute hnen atanga an lei chhawn nge? a hranpaa tute emaw drug license hmanga a hlawma chah nge? tih thlenga chhui chhuah theih a ni.
Tualchhung atanga an lak/lei a nih chuan dawr neitute chungah pawh action lak theih a ni a. Phai lam atanga chah luh a nih pawhin, a chahna atana pawimawh drug license chuanna letter-head neituin mawh a phur leh dawn tihna a ni.
“Khuh damdawi Codeine etc. bur chuti zat chu man a ni” tih chin hi mipuiin kan hriat theih a ni mai a. Dan bawhchhetuten damdawi an neih theihna kalkawnga lo inhnamhnawihte man an ni ve em? tih erawh a hnu lamah hriat zui tur a awm ngai meuh lo. “Chumi damdawi zuar chu a lo inhnamhnawih a, thubuai siamsak a ni…etc etc” tih thawm hi hriat zui tur a vâng khawp mai.
Kan duh a nih chuan, Codeine bur heti zat man chhuah atang hian, hetianga lo inhnamhnawih midang hi man chhuah tur an awm chho zut dawn tih a chiang reng a ni. Chuvangin, a zung nen lama pawh phawi kan tum si loh chuan, manchhuah tur hi eng lai pawhin a awm reng ang a, chu chu thalaite suattu a ni reng mai dawn tihna a ni.