Ruihhlo chhiarkawp

Inrinni kalta khan Siahaah home minister hovin ruihhlo do chungchang sawi ho a ni a. He hunah hian district bawrhsap chuan Siaha district-a ruihhlo lut chu ram dang (Myanmar) ni lovin district dang atanga lut a ni tlângpui tih sawiin, luhka pawimawh hmun li-ah endikna hmun ruahman a ni, a ti.
Heta tanga lo lang ta chu, Mizoram chhunga ruihhlo ti thin (drug user) te tinzawn (target)-a ruihhlo hmanga sumdawng pawl an thahnem thawkhat, tih hi a ni. |um khata ruihhlo tam tham tak mante hi Mizoram paltlanga hmun danga kal zel tur a ni, tih ni thin mah se, Mizoram chhunga ruihhlo ngaite chawmtu hrim hrim ruihhloa sumdawngte hi an tam tho a, manchhuah a pawimawh lehzual dawn niin a lang.
Mizoram mihring pun dan rate atanga chhutin kum 2025-ah khan Mizoramah mihring nuai 14.8 vel awm tawh tura ngaih a ni a. ‘National Survey on Extend and Pattern of Substance Use in India’ hmanga mithiamten an chhut dan chuan, 2025-ah khan ruihhlo ngai IDU (inchiu thin) mi 36,800 vel awm tling tawh tura ngaih a ni a, chu chu za zela 2.4 (%) vel a ni. Kumin 2026-ah hian IDU 38,000 vel, chu chu 2.5% tling thei tura ngaih a ni bawk. Kum tin mihirng kan pung ang bawkin, ruihhlo ngaite hi pung zel tura ngaih a ni.
Hei hi mithiamte ngaih dan leh chhut dan a ni mai a; kum tin ruihhlo ngai pung ve zel turin an chhut a, chu chu keini chuan ‘an pung zel tur a ni lo’ ti zawngin hma kan lak a ngai ta tihna a ni a; hma pawh kan la thei a, a sawt ngei pawhin a rinawm.
Tuna ruihhlo kan do dan langsar ber chu, Mizorama ruihhlo lo lut tur lo dan, Mizorama lo lut tawh pawh a tam thei ang ber man chhuah; chutih rualin ruihhlo ngaite “taksa leh thlaraua damna an chan theihna tura theihtawp chhuah” a ni bawk.
Tuna kan han tharthawh leh mek, “Ruihhlo la ngai ve lote ruihhlo laka an fihlim zel theihna tura hmalak” hi a pawimawh lai tak chu a ni. Ruihhlo manchhuah kawnga tha kan thawh zat te, sum leh pai kan sen zat te, khawtlangin kan buaipui luai luai ang hian emaw, hetiang aia nasa zawk daih pawhin, beihpui han thlak ve mup mup mai ila, tun atanga kum 10 a han ral leh meuh chuan, mithiamte chhiarkawpa ‘puntir’ hi ‘paih’ ah kan chhuah daih thei dawn tihna a ni.