Ruihhlo do dan report pahin ruahmanna thar siam belh
District Level Narco Coordination Centre (NCORD) Committee Champhai chu Ningani khan an chairman, bawrhsap James Lalrinchhana hoin an thukhawm.
Chairman chuan enforcement agency-ten theihtawp chhuaha ruihhlo leh a kaihhnawih hrang hrang do leh ven kawnga hma an la chu fakawm a tih thu a sawi a. Ramri dep leh dai doa awm, Champhai district-a ruihhlo leh a kaihhnawih do kawnga lungrual taka hma lak a ni chu Mizoram tan mai nilo, India ram pum tana hmalakna a nih avangin ngaihthah thiang a ni lo tih a sawi. Enforcement agency duty-te chu ramri kaltlanga lakluh, hman khat daih polythene bag (single use plastic) man zel turin a chah bawk.
Champhai SP Vineet Kumar chuan enforcement agency, a bikin Assam Rifles chu special operation an neih reng rengin inbiakpawhna leh tul danga harsatna an tawh loh nan police-te hrilhhre zel turin a chah.
Thutkhawma report danin, line department hrang hrang kaltlangin ruihhlo that loh zia inhrilhhriat chu a remchan ang zela neih thin a ni a. May thla chhung hian joint operation neih tha an ti. NCORD Committee chuan YMA-in tlawmngaia enforcement agency-te an tawiawm thin chu fakawm an tih thu a sawi a ni.
NCORD hi kum 2016-a din niin, 2022 May 10-ah District Level NCORD Committee member-te state sawrkarin a siam fel a; hemi kaltlang hian Champhai district-ah chak taka hma lak niin, rokhawlhna a awm loh chuan thla tin thutkhawm thin a ni a, hmalakna hi Narcotics Control Bureau (NCB) lamah report zel a ni.
# Kumin February atanga April thleng khan Champhai District Police chuan ND&PS Act 1985 hnuaiah case 53 an ziaklut a, hemi kaihhnawihah hian mi 66 man niin, heng zinga 11 chu ramdang mi an ni. Heroin kg 20.676, crystal methamphetamine kg 10.385 leh methamphetamine kg 31.661 bakah ganja kg 22.5 an man.
# Hemi hun chhung vek hian Excise & Narcotics Department Champhai chuan ND&PS Act 1985 hnuaiah case 13 ziaklutin hemi kaihhnawihah hian mi 14 an man a, heng zinga 6 hi ramdang mi an ni. Ruihhlo tawlh nana hman two wheeler 1 leh LMV 3 an man tel. Heroin kg 3.2 leh methamphetamine kg. 61.327 an man.
# Hemi hun chhung vek hian Assam Rifles COB Champhai leh Zokhawtharin heroin kg 19.879 leh methamphetamine kg 41.318 an man a. Customs Preventive Force-in heroine gram 1300 an man.