Ruihhlo do hi tih mai mai kan tum lo – Chief minister
Ruihhlo do chu sawrkarin tih mai mai a tum lo tih he thila inhnamhnawihten lo hria se a duh tih chief minister Lalduhoma chuan a sawi.Ruihhlo do chungchangah Excise & Narcotics Department chuan kohhran thalai hruaitute sawmin an inkawmho a. Hmanpuitu chief minister chuan thalaite ruihhloin min run a, a dolet turin thalaite bawk sipaiah kan siam a ngai, tiin, chumi bul chu an tan a. Sawrkar thawhpui turin an sawm satliah loa, thawkho tur an ni zawk tih a sawi.
“Ruihhlo do hi sawrkar hian tih mai mai a tum lo tih he thila inhnamhnawih thin leh mitinin min hriatsak ang che u. Department ngei pawh fimkhur tak leh dik taka kal turin ka ngen a ni,” a ti.
Excise & Narcotics minister Lalnghinglova Hmar chuan ruihhlo do hi thalaite nena kalpui ngai a nih avangin kohhran thalaite nen inrawnkhawm hi koh a ni tih a sawi a. “Kohhran thalaiah engtin nge ruihhlo kan do ang, tih kan sawiho anga, sawrkar nena thawhho dan kan ngaihtuah dawn a ni,” a ti.
Kohhran hrang hrang 12 atanga kalkhawm kohhran thalai hruaitute nen inkawmho a ni a. Inrawnkhawm koh hun chungchangah Seventh Day kohhran hnenah thupha chawina an thlen tawh a, an thalai hruaitute nen hun remchang hmasaa inkawmho an remti tih minister hian a sawi.
Excise & Narcotics joint commissioner Peter Zohmingthanga sawi danin, an department-ah thawktu an vaiin 478 an awm mek. An chhinchhiah danin, kum 1984 atanga 2024 January 12 thleng khan ruihhlo vangin Mizoramah mi 1811 an thi tawh a, an zinga 1592 hi mipa, 219 chu hmeichhia an ni. Chhinchhiah loh tam tak an la awm an ring. Nikumah bik ruihhlo vangin mi 74 an thi a, kuminah thi 1 a awm tawh.
Inrawnkhawmnaa CM thusawi dang:
4Zu khap bur hi a tha ber em, kan thatpui nge kan chhiatpui tih sawi tel ang che u. Mizote hi committee-a kan rel leh kan mimal ngaihdan a inang lo fo thin.
4Ruihhlo dona kawnga hmalak dan turah Central YMA hruaitute ka sawipui tawh a. Tlawmngai pawlte tichak turin Excise Acts siamrem a tul chho dawn niin ka hria.
4Fate enkawl kawngah inzir thar tulin ka hria. Inchhung sekrek engmah khawihtir lo khawpa duat hi a fel lo thei. An rilru leh taksa hi hriam takin kan buatsaih zawk tur a ni a, nawmsak hi kan zo lo fo thin.
4Thalai, a bikin mipate ruihhlo vangin an liam zel a, mi tam tak hman tlak lohin a siam bawk. Hei hian pasal tur a titlem zel a, thalai thawkchhuak thei lo an pung thur thur a, hnam a nghawng thuk hle em em a ni.