Ruihhlo do Strategy…

Kar kalta khan home minister hovin Excise & Narcotics department hotute leh Central YMA hruaitute an thukhawm a, ruihhlo hluar zel venna atana beihpui thlak dan tur an rel a. September atanga December chhungin state pawn atanga ruihhlo rawn lut zawng zawng dan chah beihpui thlak tum a ni a, mipui tawiawmna an ngen nghal a.
Ruihhlo do hi a tul si a, ‘ruihhlo do beihpui’ hi kan thlak reng mai a, kan do ber ‘ruihhlo’ lah hi a fei hrep a; a nihna takah chuan kan hneh lo a, min bawh bet tan chu a ni deuh ber; min keuhthluk tumin min nawr a, kan hnungtawlh dawt dawt mek chu a ni ber e.
YMA, pawl hrang hrang leh kohhran hrang hrangin (sawrkar chu sawi loha lum a ni a) tha leh zung, sum leh pai sengin, kawngzawh leh tawngtai rualna nen, ruihhlo kan do mup mup a, mahse ‘a zualzawpui vailenhlo’ tih zawng zawng kan chang a, ni tina ruihhlo man zat pawh, tunhmaa ‘Gram chuti zat’ tih kha, tunah chuan ‘Kg chuti zat’ tihin a thlak der tawh mai! Ruihhlo hi chuan min chim pil mek zawng a ni e.
Ruihhlo kan man chhuah tam zawk, ruihhlo man chhuah zawng zawng deuhthaw a ni zawk ang chu, hi chu min hual veltu ram atanga kan ram chhunga a lo luh fel hnua man chhuah a ni a. A ruka ramri paltlanga ruihhlo lo lut lai man chhuah nalh nalh hi chu sawi tur a vang khawp mai. Chuvangin, tuna ro thar an rel, ‘state pawn atanga ruihhlo rawn lut zawng zawng dan chah beihpui thlak’ tih hi chu kan tihmakmawh a ni a, hei hi chu tunhma atanga public rawtna lut reng thin a ni.
Russia leh Ukraine an indo mek a. Russia hian, ‘naktukah in hmun pawimawh lai chumi khami chu missile-in kan rawn kap dawn che u’ tiin puangzar lawk thin ta se, an thil tum (war strategy) chu a hlawhtling mawh khawp ang le!
Kan hriat angin US President Donald Trump khan Iran sawrkar kha a vau khur khur a, ‘nuclear program in tharthawh leh chuan in nuclear hmunpuite hi kan bomb darh vek dawn’ tiin. Iran sawrkar a vau khur khur laite khan “Operation Midnight Hammer” kha an lo peih fel diam tawh. Iran sawrkarin, ‘Trump-a hian min bomb duh tak tak mai ang’ tia nuclear a siamna hmanrua pawimawh zual lo senghawi a tum lai tak ni maw, Trump-a chu, warning a sawi hnu lawkah, a che zui leh ta mai si a; an khati ta rum rum kha a ni a!
Keini pawh hian ruihhloa sumdawngte thlim zawnga ralrel kan kalpui thiam loh chuan, kan beihpui thlak tur hi a hlawhtlin tur angin a hlawhtling lo palh ang tih a hlauhawm a ni.