Ruihhlo doin Sunday School thlenga hma lak a ngai tawh: – CYMA president

Ruihhlo do kawngah a la ti ve lo te veng turin Sunday School thlenga hma lak a ngai tawh tih Central YMA president R Lalngheta chuan a sawi.
Sub-Headquarters YMA Champhai-in Inrinnia kum 2026 hruaitu thar hlan leh YMA Kumpuan – ‘Ruihhlo Do’ an hawn a hmanpuinaah Central YMA president chuan, YMA hruaitu chu ram chhan tura Pathian hmaa ding tura inngai tur kan ni tih a sawi a. Ruihhlo do kawngah hruaitu nihna chelh si, che thei si lo kan awm em, tia zawtin, ruihhlo vangin thalai an thi zawih zawih leh, thlanmuala kan thlahliam reng mai chu thil pawi tak a ni a, hruaitute chu mahni mawhphurhna hlen tuma tan la thar turin a ngen tih a sawi.
Ruihhlo ngaiten harsatna an tawrh thin dan sawiin, thalai, in lama haw ngam lo tam tak an awm tih a sawi a. “Kan thalaite hi an sual bik vanga ruihhlo ti an ni lo, suamhmang an tawk a ni. Chu suamhmang chu ruihhlo zuartute hi an ni,” R Lalngheta hian a ti a. Chhungkaw kehchhia, ruang hlawm tur pawh awm lo khawpa harsatna kan hmachhawn mekte chu ruihhlo vang a ni tih a sawi.
Ruihhlo do kawngah kohhran leh pawl hrang hrang nen tanho thiam a ngai tih a sawi a. A la ti ve lo te veng turin Sunday School thlengin hma lak a ngai tih a sawi. Chak zawka hma lak a nih theihnan sawrkar laipui atangin ruihhlo dona atana hman tur lirthei, cheng nuai 88 man chu sanction fel a nih tawh tih a sawi bawk.
Ruihhlo do bakah hnam dang pasal neih a tlem theihna tura tan lak a ngaih thu Central YMA hruaitu hian a sawi a. tunlai hi ram kang laka fimkhur hun leh nungcha /sava ten no an neih lai a nih avangin, YMA branch tinin kangmai laka inveng tur leh nungcha humhalh kawngah tan la thar turin a ngen tih a sawi a ni.
Sub-Hqrs YMA Champhai hnuaiah hian Group pathum – tuipuiral, Vanhnuailiana leh Vanapa an awm a. Branch 67 awmin, Group huamchhungah branch 43 leh thuthmunah branch 24 an awm.