Ruihhlo dotuten CM kawm

Foundation for Drugs Free Mizoram hruaitute chuan Thawhlehni khan chief minister Lalduhoma chu a pisaah an kawm a, an pawl hmalak dan an hrilh.
Chief minister chuan sawrkar tanpuina tel loa member inphalte thawhkhawma hmalakna tha tak an kalpui avangin lawmthu a hrilh a. An hmalakna in rah tha a chhuah ngei a beisei thu sawiin, zau zawka hma an lak zel theihnan duhsakna a hlan. Ruihhlo ngaite chhanchhuahna atana sawrkarin hma a lak tawh chin pawh a hrilh a ni.
Foundation for Drugs Free Mizoram president V Lalnunthara sawi danin, an pawl hi kum 2019-a ding a ni a, ruihhlo ngai tawhte enkawl lam aimahin, tleirawl la fihlim mekte ruihhlo bawiha an luh loh nana invenna lama an bei nasa zawk a ni. An pawl member thawhkhawm sum hmangin mithiam zawkte sawmin ‘Team of Resource Persons’ an din a, an ni hmang hian kum 4 chhungin school leh kohhran hmun 66 tlawh tawhin, tleirawl 12500 te ruihhlo laka fihlim turin signature card-ah an lo intiam tir tawh a ni.
He pawlah hian chief minister ni ta Lalduhoma hi kum kalta atangin patron member a lo ni tawh a, an patron member, chief minister ni ta an lawmpui zia entirnan thilpek an hlan a ni. Tunah hian member 950 an awm a, an zingah hian MLA nilai 11 an tel.