Ruihhlo kan do dan hi…

Working Committee on Ruihhlo Do buatsaihin nimin khan Aizawlah ‘Ruihhlo Do Kawng Zawhpui’ huaihawt a ni a. He hun hmanpuitu social welfare minister chuan ruihhlo do kawngah sawrkarin theihtawp a chhuah mek thu leh, state, district leh village level thlenga awmze nei zawka hmalak a nih theih nan ruahmanna siam mek a nih thu a sawi a.
Tunhma kum sawm vel liam ta atang khan sawrkar leh YMA bakah NGO hrang hrangten ruihhlo do beihpui an lo thlak thin tawh a. Tunah hian ruihhlo hi a hluar tulh tulh a, ruihhlo ngai an pung zel a, ruihhlo ngaite enkawlna hmun tam tak a piang a. Nasa taka ruihhlo do beihpui thlak a ni thin chung pawha heti hi kan dinhmun a nih chuan, ‘beihpui’ thlak ni ta lo phei se chuan, eng ang fakaua nasain nge ruihhlo hi kan chhiatpui dawn ni!
Ruihhlo kan do dan hi a kal khat hle a, ruihhlo man chhuah lamah nasa takin tha kan thawhin kan insengso thin a, chutih rualin awareness campaign te pawh kan kalpui ve bawk tho a, mahse supply reduction lam hi kan thlurbing deuh zel a, demand reduction lamah hian hma kan la na tawk lo deuh thin niin a lang.
Tuna minister-in a sawi ang hian, sawrkar chuan ruihhlo do dan tur ruahmanna a siam mek niawm tak a ni a, ruahmanna tha tak a duan chhuah ngei beisei ila.
Ruihhlo do nana pawimawh hmasa ber chu ruihhlo ti lo tura inthuhneh hi a ni awm e; chu chu demand reduction atana hmalakna rahbi pawimawh hmasa ber a ni hial ang. Tuna naupang thang lian mekte hi ruihhlo haw tura an thluak suk hi a pawimawh hmasa ber a. Tuna thanglai mekte leh, a hnu lama naupang thanglian turte-ah nasa taka beihpui kan thlak chhoh zel chuan, tun atanga thangkhat lian velah chuan ruihhlo ti duh hi an vang pharh tawhin a rinawm.
Chuvangin, ruihhlo donaah hian, vision leh target fel tak nei chunga, alo berah pawh kum 10 chhung tal tha thlah lova beih chhoh ngar ngar hi kan dinhmun hian a phût a. A thawk aphita kawngzawh tih leh hluai ringawt lo deuh, systematic zawka hma kan lak thiam hi a pawimawh hle a ni.