Ruihhlo kan khap rem vek loh pawhin a rem duak ang – END minister

Excise & Narcotics department officer-te chuan an hnathawh dan thlirlet leh hmalak zel dan tur sawiin Thawhlehni khan an thukhawm.
Hmanpuitu Excise & Narcotics minister Lalnghinglova Hmar chuan tunhnaia Excise & Narcotics Department-in zu leh ruihhlo leh a kaihhnawih thahnem tak an man thin chu lawmawm a tih thu a sawi a. Ruihhlo chu khap rem vek theih ni kher lo mah se, theihtawpa an beih chuan a rem duak an beisei tih a sawi a ni.
“Department hnathawkte kan induhkhawp lo viau a ni maithei. Amaherawhchu kohhran thalai pawl hrang hrang leh tlawmngai pawl hrang hrang nen lungrual taka kan thawhho zel chuan ruihhlo donaah hian hma kan sawn zel ang. Department hnathawktute tan hmasawnna tur kawng hrang hrang state sawrkar leh sawrkar laipui leh tanpuina awm thei ang ang kan dap zel anga, ruihhlo do kawnga hna kan thawhnaah hian hei hi kan hrereng tur a ni,” a ti.