Ruihhlo man hnem hi a ropui em?

Excise & Narcotics department-in an hmalakna an tarlanah, kumin January- September, thla kaw chhunga ruihhlo chi hrang hrang an man hlutzawng chu cheng nuai 453 chuang a ni a. Thla 9 chhung hian Heroin Kg 80.59, Rakzu litre nuai khat chuang, zu bilh lai tin 2,12,653, Zu a senchi um 46,409 bakah neuh neuh tam tak an man a. Hetiang zat ruihhlo an man hi a lawmawm a, man lo se, a nghawng tur kan hre vek. Chutih rual chuan, hetiang zat ruihhlo chi hrang hrang man tur a awm erawh, ‘a ropui lo viau’ a ni. A ropui lo han tih hian, thawktute hnathawh a ropui lo tihna lam a ni lo va, ruihhlo chi hrang hrangin heti tak maia Mizoram a chiah hneh ta mai hi ‘a ropui lo’ kan tih chu a ni a, ‘a tlawmthlak’ kan ti dawn nge, eng nge?
Tlawmthlak tih hi tawngkam remchang tak chu a ni lo mai thei e; mahse, a tlawmthlak nachhan pakhat chu, Kristian 88% awmna state kan ni chunga hetianga ruihhlovin min bawm ta mai hi a ni. Kristian tih awmzia chu kan hria a, Krista hnungzuitu tihna a ni a, Krista duhzawng titute tihna pawh a ni ang. Mahse, kan rama thil thleng hi Krista duhzawng ni lo hlir deuhthaw a ni tawh a, chu chuan kan nihna a hril chiang viau bawk awm e.
Ruihhlo leh a kaihhnawih tam tak tak man teuh teuh hi a ropui lo tih awmzia kan hria a, ruihhlo ngaite kan buaipui dan pawh kan hre tlang; mahse, buaipui ngai titlem tura hmalakna erawh a tlem ve thung a ni mai lo maw? Ruihhlo ngaite kan buaipui hi ti ropui kan inti a, thawk ropui kan inti a, kan chhuang a, kan inpho lang a. A buaipuitu an awm hi a lawmawm lo kan tih chu a ni lo a, buaipui ngai heti em ema tam Kristian rama kan awm ta hi a ni lawmawm lo kan tih chu.
Heti reng reng hian kum kan hmang liam thin a, tunah pawh kan hmang liam leh dawn a ni ber a. “An va man hnem, an va ti tha..” kan ti liam leh puat mai thei. Kum tina ruihhlo man tur pung tual tual te, ruihhlo mantu tur thawktu inlak belh sauh sauh ngaia kan awm te hi ‘engatinge?’ kan tih zawk a ngai.
Kum thar kan hnaih ta hle a, kumthar resolution te pawh ngaihtuah a ngai leh ta. Kumthar resolution atan chuan, ‘ruihhlo man tur tlem turin tan kan la ang’ te kan tih ve theih a hun tawh a ni lo’m ni?