Ruihhlo ngai enkawlna atan TBCC A enkawl zuina atan Jordan Centre

Mizoram sawrkar chuan a hlawm lian deuha ruihlo ngai enkawlna hmasa atan Tawngtai Bethel Camping Centre chu hman theih dan dap a tum a. He hmun atanga damchhuak tha deuh tawh, eizawnna kawng zawh zirpuina atan Jordan Centre hman a tum.
Social Welfare minister Lalrinpuii chuan thuthar thehdarhtute zawhna a chhan danin, Jordan Centre Sethawn hi ‘after care’ lam buaipui turin LESDE department nen tangdunin Bana Kaih policy hnuaiah skill development centre atan ruahman an tum tih a sawi a. Ruihhlo ngai sim tawhten thiamthil chi hrang hrang zir a, eizawnna an neih theihnan leh khawtlangah mi pangngai anga an awm ve leh theihna tura ruahman a ni tih a sawi.
“Kohhran lamin enkawl hna hi an thawk thei em tih kan zawt mek a. Presbyterian Kohhran (PCI) leh Baptist Kohhran (BCM) kan bia a, an ni hian an kalpui theih loh chuan sawrkarin enkawl hna a chhunzawm ang,” a ti.
Social Welfare department hotute chuan Jordan Centre-ah hian mi 70 vel an awm thei tih an sawi.
Jordan Centre chu ‘after care’ atan hman tum a nih avangin ruihhlo ngai mekte enkawl nghalna (immediate relief) tur hmun dap a ngai dawn tih Social Welfare minister hian a sawi a. Tawngtai Bethel Camping Centre chu a enkawltute nen inbia in, hman theih an inbeisei tih a sawi.
TBCC enkawltu in sawrkar nena inzawm a duh lo nia thuthang awm chu, tunhnaia an inbiaknaah sawrkara fel taka inziahluh a duh tih an hriat thu a sawi bawk.
The Mizoram Drug (Controlled Substance) Act 2016 leh The Mizoram Drug Treatment cum Rehabilitation Center Accreditation Rules 2019hnuaiah Drugs De-Addiction Centre/ Rehabilitation Centre-ten sawrkarah accreditation an tih vek a ngai tawh dawn tih Lalrinpuii hian a sawi a. He dan hnuaiah hian infrastructure, human resource, service, documentation adt. ah minimum standards siam niin, hemi zawm lo chu centre din/kalpui phal a ni dawn lo tih a sawi.
“Accreditation hi centre-te tihtawp tumna ngawr ngawr a ni loa, centre-ten rualkhai zawk leh ruihhlo ngaiten enkawlna an mamawh ang tak an dawn theihna tura awmze neia enkawlna kalpuina tur a ni zawk. Sawrkar chuan centre din a, an theih leh phak ang tawka enkawlna lo kalpuite inpekna a hriatpui a, heng center ding sa hian awmze nei taka enkawlna an kalpui chhunzawm theihnan kawng hrang hrangin puihna pek a inhuam a ni,” a ti.
Social Welfare department hotute chuan accreditation rules zawm lo chu thla 6 chhung vel insiamthatna hun (grace period) pek an ni anga, dan an zawm that loh chuan an centre/home kharsak thlenga hma lak a ni dawn tih an sawi.
Minister Lalrinpuii sawi thenkhat:
8 Social Welfare Department hriat chinah Mizoramah ruihhlo ngai enkawlna (De-addiction & Rehabilitation Centre) 46 a awm a, heng zinga centre 11 chuan Ministry of Social Justice & Empowerment (MOSJE) atangin fund an dawng thin.
8 MOSJE atanga tanpuina dawng thin centre 11 hi Integrated Rehabilitation Centre for Addicts (IRCA) tih an ni. Ministry duan inkaihhruaina mumal tak hmangin enkawlna an kalpui a. Ministry-in a endik thin bakah social audit neih thin a ni.
8 IRCA 10 hi khum 15 awmna niin IRCA pakhat hi khum 30 awmna a ni. Heng IRCA hi khum 50 awm thei tura tihlenna tur concept proposal SASCI atanga fund turin Planning department-a thehluh mek a ni.
8 Mizorama kohhran pali – PCI, BCM, ECM leh LIKBK ten an enkawl De-addiction Center chu after care skill development course nei tel tura ngen an ni a. An kalpui theih chuan sawrkarin grants -in- aid pek a inhuam a ni.
8 Rinna-a kal, faith-based centre ho chu Pathian kohna chhang leh Pathian rinchhana kal an nih angin sawrkarin mawhah a la lem lo a. Amaherawhchu tanpuina an dil emaw puihna an mamawh chuan an pui mai thin.