Ruihhlo tawlh kaihhnawih vangin French khawpui lianah naupang zan curfew puang
Ruihhlo tawlh kaihhnawih vangin French khawpui lianah naupang zan curfew puang
French khawpui eng emaw zatah tun hnaia ruihhlo tawlh kaihhnawiha tharum thawhna a thlen nasat em avangin thalaite tan zan lamah curfew an puang.
Chhim lama Nîmes chu hetiang puan thar berna niin kum 16 hnuai lam chu ‘tharum thawhna thleng thei’ leh ‘boruak tisa thei’ laka an him nan zana chhuah an khap a. Police unit dah belh a ni bawk.
Thla hmasa khan khaw ên laia inkahna a thleng fo va, mi pakhat thiin mi tam takin hliam an tuar.
Kar hmasa khan rawlthar kum 19 mi ruang chu Nîmes daiah kang chhe vekin chhar a ni bawk.
Curfew hi zan dar 09:00 leh zing dar 06:00 inkarah kalpui turin Mayor Jean-Paul Fournier-a chuan a puang a, an dinhmun chu ‘tha lo tak’ a nih thu leh ruihhlo tawlhtuten ‘hlauhna leh firfiakna boruak’ an siam tih a sawi.
Deputy Mayor Richard Schieven-a pawhin curfew chuan ruihhlova sumdawnnaa inhnamhnawih lo naupangte a hum dawn thu a sawi a, naupang kum 12 leh 13 lek lek pawh ruihhlo zawrhnaah hian chhawr an ni tih a sawi.
Chhimchhak lama Béziers khawpuiah pawh nikum atang khan kum 13 hnuai lam tan zan dar 11:00 leh zing dar 06:00 inkar curfew puan a ni mek a, March thla khan kum hmun thenkhat bikah kum 15 hnuai lam tan tihthar a ni bawk a. “Kum 10 hnuai lam khawlaia zing dar 02:00-a la awm chuan thil dang tih an nei lo, sual lam chauh a ni,” tiin nikum khan Mayor Robert Ménard-a chuan a sawi.
Inkhuahkhirhna kalpui ni mah se Béziers-ah hian tharum thawhna a thleng nasa a. Kartawpah khan thalai, vur tleng mite hmai/lu tuamna anga tuamten police tibuaiin hal mawi tam tak an hal bawk niin tual chhung chanchinbuten an tar lang.
Chhimthlang lama Limoges-ah pawh hetiang bawk hi a thleng a. Khawpuiah hian kum 13 hnuai lam tan nipui chawlh laiin zan curfew an puang a; mahse, kartawpah khan mi 100 vel inhnamhnawihna buaina a chhuak tho va, Mayor Émile Roger Lombertie chuan an inkhuahkhirhnain ‘rah tha’ a chhuah lo tih a sawi.
Tun hnaia khawpui hrang hranga ruihhlo kaihhnawiha tharum thawhna thleng hian tun hma lama France-a mi sual pawl indona khawpui ni thin, Marseille chauh lo pawh a tibuai ta hle tih a lang nia ngaih a ni.
Interior ministry-in a chhinchhiah dan chuan nikum khan France-ah hian ruihhlo kaihhnawiha tharum thawhna thlengah mi 110 thiin mi 300 chuangin hliam an tuar.
Justice Minister Gérard Darmanin leh Interior Minister Bruno Retailleau chuan ruihhlova sumdawnna hi nasa taka do a ngai tih an lo sawi tawh thin.
Kum tirah khan parliament-in bill a pass a, dan thar hnuaiah ruihhlova sumdawng liante tanna tur venhimna tha tawk lung in pahnih siam, ruihhlo kaihhnawih bik khawih tur prosecutors’ office branch thar din, a chhuitute thuneihna tam zawk pek leh ruihhlo tawlhte chin hrilhtute venhimna tha zawk pek te a tel.
Darmanin-a chuan Thawhlehni khan ‘kan rama mi hlauhawm ber ber telin ruihhlo tawlhtu 17 chu Franch chhim lama Vendin-le-Vieil lung inah a hmasa ber atan dah luh an ni’ tih a sawi.