Ruihhlo tawlh leh ngawlveiten nun an ti ralti a, kan do a ngai – Home minister

On Aug 27, 2025 4 0

Ruihhlo tawlh leh ngawlveiten
nun an ti ralti a, kan do a ngai
– Home minister
Ruihhlo tawlhrute leh ngawlveiten rukruk leh pawi dang an khawih thin avangin nun an ti ralti a, kan do a ngai tih Home minister K Sapdanga chuan a sawi.
Tunhnaia sawrkarin police constable a lak tharte chuan Thawhlehni atang khan Thenzawl Police Training School-ah training an tan a. Hemi hmanpuitu Home minister chuan, Excise & Narcotics, YMA leh Police tanghoin ruihhlo leh ngawlvei do beihpui thlak an tum tih a sawi a. Ruihhlo tawlhrute bakah ngawlveite hian rukruk leh pawi dang an khawih thin avangin nun an ti ralti a, kan do a ngai tih a sawi.
Home minister a nih atangin kuhva tawlhruk nasa lehzualin an do a, checkgate-a a pawnga puia pawisa khawn tihtawp a ni a, tiin, police inenkawlna kawngah hmasawnna hmel an hmuh hrang hrang a sawi bawk.
Tun tuma constable lak tharte chu khirh leh fimkhur taka lak an ni a, thlan satliah an ni lo tih K Sapdanga hian a sawi a. “Mizoram Police-in bung thar kan kai a ni,” a ti. Mipui thlamuanpui tham police zahawm nih tum turin a chah a. Police uniform hlut zia leh zahawm zia hria a, an uniform hakin a entir – discipline a taka lanchhuah tir turin a fuih.
Director General of Police Sharad Agarwal chuan tun tum hi Mizoramah kum 10 chhunga a ruala police lak hnem ber tum a ni tih a sawi a. Constable basic training a telte chu kum 30 atanga 35 chhung vel police chhungkuaa telin, police chu an nihna a ni tawh dawn a, Mizoram Police thil tum a taka nun chhuahpui turin a chah.
Police constable training:
8 Tun tum Constable Basic Training hi batch 70-na an ni a, an vaiin constable 277 an ni.
8 Training tan hun hi kumin September 1 atangin a ni a, training tan hma kar khat hi ‘zero week’ tia vuahin, luh hun leh an tlangnelna hun atan hman a ni.
8 Indoor leh outdoor training kar 45 chhung ngawrh takin an kalpui anga, July 2026-a zo thei tura beisei an ni.
8 Constable lak tharte hi Aizawl district atangin 138, Lunglei 24, Serchhip 21, Champhai 23, Mamit 12, Kolasib 19, Hnahthial 6, Saitual 12, Siaha 4, Khawzawl 5, Lawngtlai 3 an ni a. An zinga 26 hi hmeichhia an ni.