Ruihhlo tawlh vangin Tripura-ah mi 1,797 man

Ruihhlo tawlh vangin Tripura-ah mi 1,797 man
Tripura-ah kum hnih chhungin ruihhlo tawlh leh cannabis chin avangin mipa 1,626 leh hmeichhia 171, an vaiin mi 1,797 man an ni.
Assembly session neih mekah home department-in a tar lan danin heng mi man zinga mi 10 chu state chhunga court hrang hrangin thiam loh a chantir tawh tih a sawi.
March, 2023 leh February, 2025 inkar khan Narcotic Drugs & Psychotropic Substances (NDPS) tlawhchhanin Tripura-a police station hrang hrangah thubuai 994 ziah luh a ni.
Kum hnih liam ta chhung hian police chuan NDPS tlawhchhan hian charge sheet 1,445 an thehlut.
Cannabis chinnaa inhnamhnawih leh ruihhlo tawlh thubuaiah hian hremna hi hrehawm taka kum 10 tan thleng a ni thei a, kum 20 thleng pawh sei theih a ni bawk a. Heng bakah hian pawisa Rs. nuai 1-2 thleng chawi theih a ni bawk.
State hian kum thum (2022-2024) chhungin ruihhlo an man tam hle a. Cannabis kg nuai 1.54, khuh damdawi um nuai 4.82, Yaba mum nuai 25.01 leh cannabis chinna ram hectare 5,853.94 an tichhia.
Tripura hi Bangladesh nen km 856 inri an ni a, heng inrina hi ram bakah lui khawkrawk tak tak niin barbed wire-in hmun tam tak hung ni mah se tual chhung mite dodalna leh a ram leilungin a zir loh avanga hung remchan lohna a awm nual a ni.
Mihringa sumdawnna, ruihhlo tawlh, ranvulh tawlh pawh ramri kâna pawikhawihna zingah hian a hluar hle bawk.
Kum 2023 kumtir atang khan Chief Minister Manik Saha-a chuan ruihhlo tawlhtute hian Tripura hi Bangladesh ramri hual vel state-a kalpui nan remchangah an hmang niin a sawi.