Ruihhlo vangin mi 30 dawnin nunna chan tawh

Ruihhlovin kawng hrang hrangin Mizoram a tibuai a, thalaite’n nunna an chan phah fo mai. Tun hnaiah ruihhlo vanga nunna chan an pung niin a lang.
Mizoram Excise & Narcotics (MEN) department-in an chhinchhiah danin, April ni 12 thleng khan kuminah mi 27-in ruihhlo vangin nunna an chan tawh.
An chhinchhiahna enin, March ni 4 thlenga kumina ruihhlo vanga nunna chan zat chu 10 a ni a, March ni 2 hnu-ah 17 laiin vanduaina an tawk leh tihna a ni.
April ni 12 thlenga nunna chante hi mipa 21 leh hmeichhia paruk an ni a, a tam ber chu heroin vanga vanduaina tawk an ni. Mi 27 zinga 18-te chu heroin vanga nunna chan an ni a, mi dang pariatte chu heroin leh ruihhlo dang khawih pawlh, pakhat chu alprazolam leh ruihhlo dang khawih pawlh a ni. Kuminah ruihhlo vanga nunna chanah mi pakhat tih loh chu an vanduainaah heroin a tel zel.
MEN department hian 1984 atangin ruihhlo vanga nunna chan zat hi an chhinchhiah a, 1984 atanga 2024 April ni 24 thlengin mi 1839, mipa 1616 leh hmeichhia 223 te’n ruihhlo vangin nunna an chan tawh.
Ruihhlo vanga nunna chan mi 1839-te zinga mi 251-te chu heroin vanga nunna chan an ni a, a tam ber mi 1161-te chu parvon spas/proxyvon vanga nunna chan an ni. Mi dang 427-te chu ruihhlo chi hrang hrang vang nunna chan an ni a, heroin leh parvon spas/proxyvon pawh hengah hian a tel nual.
Nunna latu ber parvon spas/spasmo proxyvon hi a chhuak tawh lo a, hetiang damdawi hi tihtawp a ni tawh.