Ruihhlo vangin mi 33-in nunna chan tawh

Ruihhlovin kawng hrang hrangin Mizoram a tibuai a, nunna chan phah pawh an awm thin. Kuminah pawh hriat theih chinah vanduaithlak takin mi 33-in nunna an chan tawh.
Mizoram Excise & Narcotics (MEN) department chhinchhiah danin, July ni 2 thleng khan Mizoramah ruihhlo vangin mi 33-in nunna an chan tawh a, mipa 28 leh hmeichhia panga an ni.
An chhinchhiah danin, heroin vangin mi pakuain nunna an chan a, mi dang 24 chu heroin leh ruihhlo chi dang vanga nunna chan an ni.
Kumina ruihhlo vanga nunna chante hi kum 19 leh kum 44 inkar an ni tiin an chhinchhiah.
MEN department chhinchhiah danin, 1984-ah Mizoramah ruihhlo vanga nunna chan an awm tan a, 2025 July ni 2 thlengin ruihhlo vanga nunna chan hi mi 1912, mipa 1681 leh hmeichhia 231 an ni.
Ruihhlo vanga nunna chanah hian a tam ber, mi 1161 chu parvon spas leh spasmo proxyvon vanga nunna chan an ni a, heroin vanga nunna chan mi 291 an awm. Mi dang 470 chu ruihhlo chi hrang hrang vanduaipui an ni.