Ruihhlo vangin mi 50 chuangin nunna chan tawh

Ruihhlovin kawng hrang hrangin Mizoram a tibuai a, nunna chan phah pawh an awm; kuminah chhinchhiah theih chinah mi 50 chuangin nunna an chan tawh.
Mizoram Excise & Narcotics (MEN) department-in an chhinchhiah danin, September ni 5 thleng khan Mizoramah mi 52-in ruihhlo vangin nunna an chan tawh a, mipa 45 leh hmeichhia pasarih an ni.
Ruihhlovah pawh heroin a hluar nasa a, mi 52-in vanduaina an tawhnaah pawh hian heroin hi a tel deuh zel. Mi 52-te zinga mi 33 chu heroin vanga vanduaina tawk an ni a, mi dang 17 chu heroin leh damdawi ruihhlo chi dang khawih pawlh an ni. Alprazolam leh damdawi ruihhlo chi dang vanga nunna chan pakhat a awm a, khuh damdawi (cough syrup) leh ganja vanga nunna chan pakhat a awm bawk.
An chhinchhiah danin, kumina ruihhlo vanga nunna chante hi a naupang ber kum 19 mi, a upa ber kum 52 mi a ni.
MEN department-in an chhinchhiah danin, 1984-ah ruihhlo vanga nunna chan an awm a, chumi hnu 2024 September ni 5 thlengin Mizoramah mi 1864-in nunna an chan tawh. Ruihhlo vanga nunna chan hi mipa 1640 leh hmeichhia 224 an ni.
An chhinchhiahnaa a lan danin, damdawi ruihhlo spasmo proxyvon leh parvon spas kha nunna latu lian ber a ni a, mi 1161-in hetiang damdawi vang hian nunna an chan tawh.
Spasmo proxyvon leh parvon spas hi mihring tana siam damdawi a ni a, mahse hetiang damdawi hi an siam tawh lo. MEN department chhinchhiahnaa a lan dan chuan 2017 hnu lamah hetiang damdawi vanga nunna chan hi an awm tawh lo.