Ruihhlo ‘weed’ a hluar
Ruihhlo han tih hian rilruah heroin a kawk mai thei a, mahse heroin chauh ni lovin ruihhlo chi dang pawh a hluar. Tunlaiin ‘weed’ a hluar a, man tur pawh a tam.
Tunlaiin khawlai tawngkamah ganja kha ‘weed’ tiin an sawi a, hei hi khawvel hmun danga an sawi dan pawh a ni. Police leh excise department hotute’n a hluar an ti a, a zu thin an pung an ti.
An sawi danin, a zu thinte hian meizial enin an en a, meizial chi khat zu-ah inngaiin, thil sual ti-ah pawh inngai lovin an zu mai mai a ni awm e. Tripura leh Shillong atangin a rawn lut ber an ti.
Khawvel mi larte zingah ‘weed’ khawih thin an awm a, intih tunlai nana lo hmang ve, changkannaa ngaia weed lo zu ve hi thalai zingah an awm an ti.
Kum liam ta 2024-ah khan Mizoram Excise & Narcotics (MEN) department-in ganja hi kg 578.592 lai mai an man a, Mizoram Police-in kg 305.387 lai an man bawk. 2023-ah khan MEN department-in kg 179.233 an man a, police-in 112.943 an man. 2024-a an man hian a hma kuma an man a khum nasa hle. Police-in kuminah March ni 20 thlengin kg 7.031 an man leh tawh bawk.
Ganja man zat
Kum Excise Police
2018 Kg 187.568 Kg 89.629
2019 Kg 370.068 Kg 143.227
2020 Kg 127.449 Kg 73.524
2021 Kg 376.204 Kg 28.476
2022 Kg 152.214 Kg 129.825
2023 Kg 179.233 Kg 112.943
2024 Kg 578.592 Kg 305.387