Ruihho dona atan sum sem

Ruihho dona atan sum sem
Working Committee on Ruihhlo Do kaltlangin agency hrang hrangte hnenah ruihhlo dona tur sumfai chu Thawhtanni khan Aizawlah sem a ni a, a vaiin cheng vaibelchhe hnih semchhuah a ni.
Sumfai hlantu Excise & Narcotics minister Lalnghinglova Hmar chuan tlawmngai pawl nen sawrkar thawhhona tha tak avangin a lawm a, chhunzawm zel tlak nia a hriat thu a sawi. Sawrkar, tlawmngai pawl leh kohhran chu tun aia nasaa an tanrual phawt chuan Mizoramah ruihhlo a tih tlem theih nia a hriat thu a sawi bawk.
Ruihhlo donaa sawrkar tha tichak tura sawrkar hmalakna pakhat atan Excise & Narcotics department tan sawrkarin lirthei ke pali nei 14 leh two wheeler 4 a pek bakah thawktute pawh a theih ang anga an inlak belh dan leh district thar pathumah Excise office a rang lama hawn tum a ni tih a sawi a ni.
Sumfai sem dan hi category hrang hranga then a ni a. Ruihhlo lo lut dan lam hna – supply reduction thawktu mi 6 hnenah sum hi hlan niin, Excise & Narcotics hnenah nuai 30, police – nuai 35, Food & Drugs Administration – nuai 2, CYMA – nuai 35, Mara Thalai Pawl leh Young Lai Association hnenah nuai 5 ve ve hlan a ni.
Ruihhlo la ti lote ven leh ti tawhten an sim theihna lama hma lakna – demand reduction thawktu Social Welfare hnenah nuai 40 leh Mizoram State AIDS Control Society hnenah nuai 5, district administation tin hnenah Aizawl – nuai 2, Lunglei, Siaha, Champhai, Kolasib, Serchhip leh Mamit hnenah nuai 1.5 theuh bakah Lawngtlai, Hnahthial, Khawzawl leh Saitual hnenah nuai 1 theuh hlan a ni.
State Level Committee on Ruihhlo Do-in training, workshop adt ah nuai 20 leh mass media hmanga ruihhlo dona lam thu tihchhuahna atan nuai 8 dah a ni bawk a, a vaiin nuai 200 a ni.