Ruihtheih thil ti zingah rilru lam harsatna nei tam

Rilru lama harsatna (mental disorder) nei enkawl tura mithiamte hnena tlulut zingah ruihtheih thila tang an tam ber a, anxiety leh stresss neiten an dawt.
October 10 kha khawvel puma rilru hriselna kawnga inzirtir leh rilru lam natna kaihhnawih avanga harsatna thleng thei laka inzirtirna “World Mental Health Day” a ni a. National Mental Health Programme bultumin Aizawlah pawh hman a ni.
He hun hmanpui tura sawm Blessino Nursing School, Synod College of Nursing leh Aizawl West College zirlaite hnena zirtirna pe tura resource person atana sawm Govt T Romana College principal Dr Jennifer Lalbiakdiki, Addl SP Crime Branch Lalthakima, MJA president C Lalrambuatsaiha, H&FW joint director Dr Ruth Lalmuanpuii leh NTCP legal consultant Vanlalzari ten thupui hrang hrang hmangin rilru hrisel neih a pawimawh zia leh rilru lam harsatna in nghawng pawi a neih dan an sawi.
Tele Manas counsellor C Lalhruaitluangi kaihhruaiin chhan hrang hrang vanga rilru lama buaina leh harsatna neite puitu tura buatsaih Tele Manas chungchang zirho a ni bawk a. Toll free no. 14416 hmangin eng hunah pawh harsatna thlen theih a ni tih sawi a ni.
NMHP data tarlan danin, kum 2019 atanga 2023 thlengin District Mental Health Programme pantute zingah psychoactive substance use (ruihhloh kaihhnawih rilru lam buaina) a sang ber a, zaa 32 vel a ni. Anxiety, stress leh a dangten dawtin zaa 16 vel a ni. Mood disorder-depression leh bipolar disorder ang chi zaa 14 vel an ni bawk.