Ruihtheih thila buaite tan luangchhuak
Ruihtheih thila buaite tan luangchhuak
Central YMA huaihawtin Inrinni khan Operation Kingdom Ministry (OKM) Phunchawng-ah a thlawnin an hrilsena endik sak an ni a. Private hospital intelkhawmna pawl – Non Government Hospital Association of Mizoram (NGHAM) bakah Mizoram State AIDS Control Society, Mizoram Chemist & Druggist Association leh National TB Elimination Programme tangho tih a ni.
OKM ah hian enkawl lai 380 awmin, thawktu 44 an awm mek a. NGHAM hian doctor leh nurse thahnem tak an thawhchhuah pui a; Mizoram Chemist & Druggist Association-in a thlawnin damdawi thahnem tak an thawh bawk. MSACS hian HIV screening leh ART damdawi la mekte dinhmun an endik a, NTEP hian TB screening leh test tul ang an tihsak bawk.
He hunah hian Central YMA treasurer Roneihthanga chuan OKM-a awm mekte chu fuihin, ram leh hnam chhannan he Centre hi hmang turin a ngen a; Mizo mipate tan a ngai, tiin, ruihhlo bawiha tang tawh lo turin a chah.
Damdawi zuar pawl, Mizoram Chemists & Druggists Association (MCDA) chuan Mizoram Social Welfare department-in ruihhlo ngaite chhanchhuahna tura vawiin – July 21 atanga camping ‘Hulhliap Short Stay Centre’ a buatsaih turah Inrinnia Central YMA-in OKM Home-a health clinic a buatsaihna atan damdawi chi hrang hrang cheng nuai 5 chuang man hu an pe tih an sawi.
MCDA hian kum dangah pawh Myanmar leh Manipur raltlan tan, ramria duty police-te leh Tawngtai Bethel Camping Centre-ah te health clinic neihin damdawi hi cheng nuai man an lo pe fo tawh thin tih an sawi a ni.
Tunah hian Mizoram pumah damdawi zuar, MCDA-a inziaklut mi 4000 vel an awm a, damdawi zawrh leh hralh leh a thiar kual tur, medical representative leh a kaihhnawih hrang hrang atanga eizawng, chhungkaw chawmna atana hmang mi nuai dawn an awm tih an sawi. Tunhnai lawkah pawh an member-te thawhkhawm atangin CM Relief Fund atan cheng nuai 6 an hlan tih an sawi bawk.
MCDA chuan damdawi hmansual theih, ruihna atana hmang an lo awm thin chu pawi an tih thu sawiin, drug license neiloten bazar leh office vela khaikuala damdawi an zuar fo chu phal loh a ni hria a, ruihtheih damdawi thehdarh thin chu thuneituten man chhuakin hrem thin se an duh tih an sawi a ni.