Rukruk thubuaia thiam loh changte kutzungtang tan sak

Rukruk thubuaia thiam loh changte kutzungtang tan sak
Iran thuneitute chuan rukruk thubuaia thiam loh chantir pahnihte kutzungtang a tansak niin human rights group pakhat chuan an sawi.
Iran lam chuan Islamic danah hremna atan phalsak an nih thu an sawi ve thung a, mahse hei hi hman zen zen loh leh hman loh hram dan kawng an zawn thin zawk thu sawiseltute chuan an sawi thung.
Heng Kurdish hnam pahnihte hi thawhlehni khan Iran hmarchhak lam Urmia khawpuia jail pakhatah an kut dinglam zungtang pali ve ve chu guillotine machine hmanga tansak an nih thu report thenkhat chuan an tarlang. Hemi hnu hian damdawiin lamah enkawl an nih thu sawi a ni bawk.
US a human rights pawl lian tak pakhat chuan hemite hi an kutzungtang tansak an nih phahna em tur chu an nih loh thu sawiin, kum 2019 a rukruk thubuaia man an nih thu an sawi a, lung ina dah an nih hnu hian tlawh leh biakpawh phal an ni lo niin an sawi zui.
Islamic republic-ah hian an sharia dan hnuaiah kutzungtang tan phal a ni a. US-a Abdorrahman Boroumand Centre-in a tarlan danin, kum 2000 January thla atang khan Iran thuneitute chuan mipa 131 chu an zungtang an tan tawh a ni.