Russia beitu ten nasa zawka beih zel

Russian paramiliatry group leader chuan Ukraine atanga Russia ram chhunga luta chetlakna an neih chu an chhunzawm tur thu a sawi.
“Lehlamah sawn min hmu leh ang” tiin Denis Kapustin, Russian Volunteer Corps (RDK) kaihruaitu chuan a sawi.
Russia chuan RDK te hi a hnawh kir thu leh an zinga 70 vel a kahhlum thu a sawi a Russian Defence Minister Sergi Shoigu chuan chetlakna an nei leh a nih chuan na zawka an hmachhawn tur thu a sawi bawk.
Denis Kapustin hi Russian nationalist anga hriat lar niin an group chuan mono-ethnic Russian state an duh tiin a sawi a.
Thawhtannia Belgorod region beih pawh kha RDK bakah Liberty of Russia Legion (LSR) te chuan an tih a nih thu an sawi bawk.
Kapustin chuan Ukraine hnaia Russian ramri chhung an beihnaah an lawm tawk thu a sawi a. An group chuan ralthuam pawimawh man an neih nual thu a sawi bawk a. Russia ram hi darkar 24 hnuah an chhuahsan tiin a sawi bawk.
RDK fighter pahnih hliam an tuar tia sawiin Russian military nunna chan an tam thu a sawi bawk a. Chutiang bawkin LSR te pawhin an fighter pahnihin nunna chanin midang 10 in hliam an tuar an ti ve bawk.
Denis Kapustin chuan an fighter te chuan Khawthlang ram tena Ukraine mahni invenna tura a pek ralthuam te an hmansak lo tiin a sawi bawk.
Russia chuan RDK leh LSR te hi Ukrainian militants tiin a sawi a, mahse, Kyiv chuan anti-Kremlin paramilitary tiin a sawi ve thung a. Kapustin chuan Ukraine chuan RDK te hi medical supply, petrol leh ei leh bar tur bak a pe lo tiin a sawi bawk.