Russia-in an sipai hotu lawk kaptua puh mi pathum man

Russia-in an sipai hotu lawk kaptua puh mi pathum man
Russia chuan an sipai hotu lawk tak Lt Gen Vladimir Alexeyev-a kaptu nia an hriat mi pathum an hre chiang tawh tih an puang.
AN zingah hian Ukrainian, Russian khua leh tui, Lyubomir Korba-a a tel.
Russia-a Investigations Committee (SK) chuan Korba hian ‘Ukrainian intelligence services-ten firfiaka che tura an tihna hlen chhuak turin’ December khan an khawpui, Moscow a thleng niin an sawi a. Kyiv erawh chuan an inrawlh lo tih a sawi thung.
Kum 64 mi, Alexeyev-a hi Zirtawpnia Moscow hmarthlang daia an chenna hmuna kah a nih hnuah damdawi inah lak a ni a. Zai a nih hnuah a harh chhuak tawh niin Russian chanchinbuten an tar lang.
Alexeyev-a hi Russia-a military intelligence agency GRU director-a an No. 2 a ni a, beih a ni hi an ramin February, 2022-a Ukraine a beih hnua Moscow leh a chhehvela mi langsar beihna thar ber a ni.
An thupuangtu, Svetlana Petrenko-i chuan a kaptu hian vawi thum a kap a, a tlanchhe zui tih a sawi a. A hnu lawkah Korba-a hi United Arab Emirates (UAE)-ah a kal nghal zui a, man a ni a, hruai haw a ni tih a sawi.
Russian sorkar TV channel Ru-24 chuan venhim hna thawktuten Korba-a hi a hmun hriat lohva thlawhnaa an hruai lut lai an tilang.
“Chhuituten a hmunhma an dap nasa a, mi thahna hmanrua, Makarov pistol leh a ri thupna leh kartut pathum an hmu,” tiin Petrenko-i chuan a sawi a. Silai hi Forensic test neih a ni bawk.
Kremlin thupuangtu, Dmitry Peskov-a chuan President Vladimir Putin chu UAE President Sheikh Mohamed bin Zayed Al Nahyan hnenah Korba man tura an puihnaah lawm thu a hrilh tih a sawi niin Russian chanchinbuten an tar lang.
Ukrainian Foreign Minister Andriy Sybiha chuan Zirtawpni khan sipai lal kahnaah hian Kyiv-in inrawlhna an nei lo tih sawiin an ram chhung thil buaina inmung chhuak niin a sawi niin Reuters chuan a tar lang.
Russian Foreign Minister Sergei Lavrov-a chuan Kyiv-in he beihna hi an tih niin February, 2022 atanga an indo titawp tura an inbiakna tihkhawlhkham an tumna a nih thu a sawi.
Alexeyev-a boss, GRU head Adm Igor Kostyukov-a hi UAE khawpui, Abu Dhabi-a Ukraine leh US aiawhte nena an inbiaknaa Russian aiawh zingah a tel.
Korba-a hi man a nih hmain SK-in Viktor Vasin tia an sawi chu Moscow-ah an lo man tawh a. Hmeichhia, Ukraine pana kal, Zinaida Serebritskaya-i pawh man a ni tawh bawk.
Ukraine hian a hma kha chuan Russian sipaite an bei fo tih an sawi a, Russian intelligence thuneitute pawhin January thla tawp khan St Petersburg-a Russian sipai beih an tumna erawh an lo dang niin an sawi.