Russia-in drone hmangin Kyiv bei

Russia chuan nikuma Ukraine a run tan atanga drone hmanga Kyiv a beih nat ber a kalpui tiin Kyiv mayor chuan a sawi.
Russian drone te hian darkar ruk zet beiin harsatna nasa tak a siam a, a bik takin Kyiv hmar leh khawchhak lam an thlurbing deuh bik a ni.
Officials te chuan drone te hi Iranian siam Shahed drone te niin 75 lai tirhchhuah niin pakhat tih loh chu kahthlak vek a ni an ti bawk a.
Russia hian missile stock a neih tlem tawh avangin Shahed drone chu a hmang nasa hle a, ballistic missile te aia muang niin thla danglam tak a nei bawk.
Missile emaw drone emaw pawh kahthlak ni se, lei lama a tlakna lam chu hlauhawm tak a la ni tho.
Drone hmanga beihna avang hian nunna chan an awm hriat a ni lo va, mi pangain hliam an tuar thung niin Kyiv mayor Vitaliy Klitschko chuan a sawi.
Tun hnaiah Moscow chuan missile a lakhawm tia sawi a ni a. Ukrainian President Volodymyr Zelensky chuan Moscow chet dan chu na taka a dem thu sawiin ‘Russian terror kalhna lamah khawvel ram dang te nen kan thawkho zel ang’ tiin a sawi.
Khawthlang ram thlawpna leh puihna neih zui zel bakah Ukraine chuan European Union member nih ngei a tum bawk a ni.
President Zelensky chuan drone hmanga Kyiv-in beih a tawh ni chiah hi kum 1932-1933-a Soviet dictator Joseph Stalin hrekna vanga Holodomor famie tia hriat lar Ukrainian nuai tel tena an thih phahna chhan tun thlenga hriatrengna hun an la hman ziah ni chiah a ni a ti bawk.
Thlasik a na zual zel a, Russia chuan Ukraine energy infrastructure te a thlurbing leh ngei dawna ngaih a ni a. Tuna a beihna avang pawh hian central Kyiv region-ah chenna in 16,000 velin power an neih loh phah zui a ni.
Nikum khan Moscow strategy chu Ukrainian tena an mamawh em em power leh tuithianghlim danchah sak a ni a, mahse, Ukraine sorkarin rang takin pipe leh powerline te a siamthat theih zel avangin a hlawhchham a ni.