Russia-in hun rei muanna tur ngaihven tak tak lovah Ukraine puh

Russia-in hun rei muanna tur ngaihven tak tak lovah Ukraine puh
Russia chuan Ukraine-in hun rei tak daih tur muanna ‘a ngaihven tak tak lo’ niin a sawi a, Moscow-in a thil phutte nena intu lo takin a himna tur chauh a ngaihtuah niin a puh bawk.
Russian Foreign Minister Sergey Lavrov-a chuan Ningania thuthar lakhawmtute a kawmnaah, “Ukrainian roreltute leh an aiawhte hian tuna kan dinhmun mekah an sawiah hian muanna tur rinngam, tlo, dik leh rei daih tur lam an ngaihven miah lo,” a ti.
Lavrov-a chuan Russia-in duh dan a neih chu Russian President Vladimir Putin-a’n Ukrainian President Volodymyr Zelenskyy-a biak a nih thu a sawi a; mahse, chumi hmain hotu pawimawhten thui tak buaipui hmasak tur an nei niin a sawi.
Hemi hma lawk hian Zelenskyy-a pawhin Putin-a chu a biak theih reng thu a sawi ve bawk a; mahse, an inbiak hmain a thawhpuiten nakin zela Russian-ten Ukraine an beih lohna tura himna leh inbeihna tihtawp phawt a ngaih thu a sawi.
Ningani vek khan Zelenskyy-a hian lehlam lehlam hi indo zel turin an inbuatsaih ve ve tih a sawi a. Russia chu chhim lamah ral hmatawngah inchhawp belhin Ukraine pawhin long-range cruise missile a enchhin tih a sawi bawk.
US President Donald Trump-a chuan Russia-in kum thum leh a chanve chhungin Ukraine a rûn tawh chu Zelenskyy leh Putin inbiaa tihtawp tumin a bei mek.
Kum tam tak khawthlang ramin Russian hruaitu a lo hrek tawhna hlip mah se muanna tura inremna a la awm thei lo.
Trump-a chuan a social media platform, Truth Social-ah Russia-in a rûn tirh khan president ni sela chuan ‘a thleng dawn lo’ niin a tar lang.
“Khatiang remchang kha a awm lo vang,” a ti a. “Hmabak ngaihvenawm tak a awm,” tiin sawi thui lovin a ti bawk.
January-a Trump-a’n White House a luah leh hnuah indo tihtawp tumin a bei nghal a, Russian sipaite pawhin hma an la chak lo sawt a; mahse, kil hrang hrangah ram an la tawh.
UK leh France telin Ukraine thawhpui ramte chuan sipai thilah an pui mek zel a. Lavrov-a chuan Kyiv-a European sipai dah chu ‘pawm theih loh hulhual’ tiin a sawi.
Ukrainian hruaitu chuan an ram himna tur pawm a nih hun hunah Trump-a’n Putin leh Zelenskyy inhmuhna hun a siam tur thu a sawi a. Russian hruaitu nena an inhmu dawn a nih erawh chuan European rama ‘neutral’ hmunah a nih ngei a ngaih thu leh Moscow chu a theih loh thu a sawi bawk.
Zelenskyy-a hian indo tihtawpna tur awm chhun chu Putin-a nena an inbiak chauh a nih thu a sawi a, Trump-a a tel pawh a tul thu a sawi.
Moscow erawh chuan Putin leh Zelenskyy hi tun maiah an inhmuh dawn loh thu a lo sawi tawh a, nakin zela Ukraine himna tur chu la sawiho ngai a nih thu a sawi a ni.