Russia-in Kyiv a kahnaah mi pakhat thi, chhiatna thlen nasa

Ballistic missile leh hmanraw dang hmanga Russian-ten Inrinni zan (Pathianni tuk)-a Kyiv an beihnaah mi pakhat a thi a, mi 16-in hliam an tuar bawk tih tual chhung thuneituten an sawi.
Zing dar 1:30 velah Russia hi che tanin darkar tam tak an bei a, khawpui hmun hrang hrangah thil puak ri a tam hle.
Russia hian missile 41 leh attack drone 125 hmangin Ukraine hi an bei niin Ukrainian air force chuan an sawi a. President Volodymyr Zelenskyy-a chuan missile tam zawk hi an khawpui bituma kah chhuah a ni tih a sawi.
Beihna avang hian Kyiv-a district pangaah kangmei a chhuak a, chenna in, pisa leh industry hmun, dormitory leh lirthei tam tak a chhia tih State Emergency Service chuan a sawi.
Sviatoshynskyi district-ah chhanchhuah hna thawktute chuan mi mal in kang atangin mi pali an chhanchhuak a, Shevchenkivskyi district-ah in chhawng thuma sang kang atangin a chengte an chhanchhuak bawk a. Mihring chen lohna in pakhat kang chu thelh mih a nih hnuah mi pakhat ruang an hmu zui a ni.
Solomyanskyi, Desnianskyi leh Dnipro district-ah pawh kang thelhtute an chet chhuah a ngai bawk.
Russian defense ministry chuan Kyiv-ah hian Flamingo drone leh Neptune guided missile part siam chhuahna hmun telin Ukrainian sipaite hmun an bei tih an sawi a. Heng hmunte hi ‘hmanrua leh drone rem khawmna, robotic system leh electronic warfare bungrua siamna’ a nih thu an sawi.
Russia hian tun hnaiah Ukraine-in Russian ballistic missile kah thlak nan a hman thin ber, Patriot air defence system an tlakchham mek laiin Kyiv hi a bei nasa hle.
US President Donald Trump-a chuan Ukraine hnena Patriot interceptor missile siam chhuah phalna pek tumin hma a la mek tih a sawi a, hei hian Kyiv-in Russian ballistic missile hmanga a beihna laka a himna tur a tichak thei dawn a. Hetih rual hian engchen nge an thlen tawh tih a chiang lo.