Russia-in Kyiv khawpui bei

Ukrainian capital Kyiv chu Russia chuan vansang atangin a bei nasa hle tiin Kyiv official te chuan an sawi.
Mi pathumin hliam an tawrh phah tia sawiin Russia hian Kyiv khawpui beih nan hian drones leh missiles te a hmang tia sawi a ni bawk.
Social media-a tarlanah Kyiv air defence system tena heng Russian missiles te an kap thla lai tihlan a ni bawk a.
Russia hian tun hnaiah air campaign nasa zawka tiin hei hi chhim lama Ukrainian tena nasa zawka nawrna an kalpui hmaa a chetlakna a ni.
Kyiv khawpuiah chuan air raid alert tihchhuah niin a hnu darkar hnihah tihtawp zui a ni a, tun hi Kyiv khawpuiin tun thla chhung ringawta beih a tawh tum riatna a ni tawh bawk.
Ukraine’s armed forces head, Valeri Zaluzhny chuan Russia hian Kyiv hi hmar, chhim leh chhak lam atangin air, sea leh land-based missile hmangin a bei a ti a. Heng missile tin te hi Ukraine chuan a lo kap thla vek tiin a sawi bawk.
Serhiy Popko, Ukrainian capital military administration hotulu ber chuan ‘hun rei lo te chhunga Russia in Kyiv khawpui a beihna nasa ber’ tiin a sawi bawk a.
“Information an neih atangin Kyiv airspace-a hmelmate chet lakna tin te hi hmuha tihchhiat vekin a awm a ni,” tiin a sawi.
Kyiv-a chengte chu tukverh bul hnaia awm lo tura ngen niin a chhan ber pawh missile kahthlak kehthem chuan a den fuh palh theih avanga fimkhur nana tih a ni a.
Mayor Vitali Klitschko chuan rocket kehthem te chu central district ah a tla tia sawiin sahuan-ah thenkhat chu a tla tiin a sawi bawk a. Solomyansky district-ah tla tam berin chung zingah chuan international airport pawh a den zingah a tel a ti bawk.
Tun hnaiah President Volodymyr Zelensky chuan European tour neiin Western ram te chuan ralthuam dollar billion tel hu pek an remti a, Zelensky hian UK Prime Minister Rishi Sunak leh President of France Emmanuel Macron te chu a hmuh zingah an tel a ni.
Russia-in Ukraine a run hnuah civilian leh sipai sang tam takin nunna an chan phah tawh a, khawpui tam tak tihchhiata awm tawhin Ukrainian maktaduai 8.2 vel te chu Europe-ah refugee angin an awm mek a, Russia-a tlanchhia pawh maktaduai 2.8 vel an awm bawk.
Ukraine hnenah hian khawthlang ramte chuan ralthuam tha tak tak an pek tur thu sawiin heng an ralthuam pek te hi a bik takin vansang lama invenna tur kaihhnawih a tam hle a. Zelensky chuan a hma pawhin vansang lamah invenna an neih loh thu a lo sawi tawh a ni.