Russia-in missile-a Dnipro a kahnaah mi pali thi

Russia-in missile-a Dnipro a kahnaah mi pali thi
Russian missile-in Ukrainian khawchhak lama Dnipro khawpui a kah fuhah mi pali an thi a, mi 40-in hliam an tuar bawk tih thuneituten an sawi.
Thawhtanni tuka an kahnaah hian ballistic missile an hmang nia sawi a ni a, finfiahna erawh a awm lo.
Online-a video tihchhuahah chuan motor kawng sirah na takin a puak a, tual chhung chanchinbute chuan office block, car leh dawrte a fuh a, a chhe nasa niin an tar lang.
Dnipro hi inbeih mekna atanga km 100 vela awm niin Moscow-in February, 2022 atanga a rûn atang khan Russian-te beih tawk nasa ber pawl a ni.
Hetianga beih a nih hnu lawk hian US palai, Steve Witkoff-a chuan President Vladimir Putin-a hmua indona titawp turin Moscow a pan a. Witkoff-a hian kuminah Russian president hi vawi tam tak a tlawh tawh a, Kyiv erawh a la tlawh lo.
Pathianni khan Ukrainian aiawhte chuan Witkoff, US Secretary of State Marco Rubio leh Donald Trump-a makpa, Jared Kushner te chu Florida-ah an hmu.
Ukrainian President Volodymyr Zelensky-a chuan an inbiakna chu ‘thil tha tak’ a nih thu a sawi a, hetih rual hian tih tur ‘hautak tak’ an la nei niin a sawi a. A hmain Rubio-a pawhin indawrna ‘hlawk tak’ a nih thu leh ‘hna thawh zawh tur a la awm’ tih a sawi bawk.
Florida-a inhmuh khawm hi US thuneituten indo tihtawp nana ruahmanna an neih sawipuia Ukrainian leh Russian aiawhte an hmuh hnu a ni.
Indo tihtawp tuma beihna a nasat mek zel lai hian Moscow leh Kyiv chuan an tanhmun an la thlak thei lo.
Russia hian an duh ber chu Ukraine-in an la luah mek, Donbas region atanga an inhnuh kir a ni a, Kyiv-in hei hi tih a tum lo thung.
“An inhnukdawk a nih loh chuan ralthuam nen nawr chhuah a ni ang,” tiin Putin-a chuan a sawi a. Zelensky-a’n chhangin ‘indo tihtawp tumna hi Russia hian a hmusit’ niin a sawi.
Nakin zela Ukraine himna tur pawh an mutan a ni a. Kyiv leh an European thawhpuite chuan himna tha tawk peka beih an tawh tawh loh nana Nato-a telh thlengin an duh a. Russia-in hei hi phal lovin Donald Trump-a pawhin a remti lo bawk.
Hetih lai hian Zelensky-a hian Thawhtanni khan Paris thlengin French President Emmanuel Macron nen an inhmu a, Ireland a pan zui leh.
Russia-in February 24, 2022 atanga a thenawm a rûnatang hian sipai sang tel leh civil mi sang tam tak an thi tawh a, mi maktaduai sarih vel an raltlan mek bawk.
Soviet ram ni thin pahnihte hi kum 2014-a Ukraine-a Russia tantu president paih thlak a nih hnu leh Russia-in a chhan let nana Crimea a luahsak atang khan an la inrem thei lo.