Russia-in thungrulh zel tum mai thei

Russian President Vladimir Putin chuan Moscow-in Western ram te bei thei tur ram dangte ralthuam hmangin a chawm mai theih thu a sawi.
Putin hian khawthlang ram tena Ukraine hnena long-range weapons an pek chu sawiselna a neihah heng thu te hi a sawi a ni.
Khawthlang ram tam tak United States pawh telin, Ukraine chu an ralthuamte hmanga Russia ram chhung an beih remtihna an pe tawh a.
Chutiang thil a thleng a nih chuan harsatna nasa tak a thleng ang, tiin Putin chuan a sawi a. “Tuin emaw indona hmunah an ralthuamte min beih nana hman an remtia an pe a nih chuan eng vangin nge keini pawhin chung ramte beih nan chuan ram dangte kan puih ve mai loh ang,” tiin Russian president chuan a sawi a.
“Phu tawk ang zela chhan let tur a ni mai a, kan ngaihtuah zui ang,” tiin a sawi.
Putin hian a thusawiah Germany chu a thlurbing zual anga ngaih niin tun hnaiah Germany chuan Ukraine chu a long-range weapons pekte chu Russia ram chhung a beih nana hman remtihna a pe a ni.
“Missile tam zawk Russian territory beihna tur pek zel an ni ang an tih hian Russian-German inlaichinna an tichhia tihna a ni” tiin Putin chuan a sawi bawk.
US President Joe Biden pawhin Ukraine hnenah American supplied weapons te chu Russia ram chhung beih nan hman remtihna a pe tawh bawk a, mahse, Kharkiv region chauh beih nana hman a remti thung. White House chuan Ukraine chuan long-range ATACMS missiles chu Russian ram kah nan a hman a phalska lo thung.
Tun hnaiah Ukraine chuan US weapons te chu Russia ram chhung beih nan a hmang thung a.
Tun hnaiah Russia in Ukraine northern border a nawr nasat zual vangin Kharkiv hmarchhak lamah inbeihna a nasa hle a. Kharkiv hi Ukraine a khawpui lian ber dawttu niin ramri atanga 30km leka hlaa awm a ni.
UK Foreign Secretary Lord Cameron thung chuan British weapons te hman thuah Ukraine thu thu tia sawiin a duh chuan Russian territory beih nan pawh a hmang thei a ti ve thung.
Ukraine chuan North Korean missile te chu Russia-in Ukrainian territory beih nan a hmang nasa tiin a sawi a, Western intelligence te chuan Russia chuan Iran siam drone te a hmang nasa an ti bawk.
Putin chuan kum tina neih thin St Petersburg International Economic Forum neihnaa thusawina a neihah Khawthlang ram te chuan Moscow chuan a nuclear weapons te a hmang lovang an ti a ti a.
“Eng vang emaw in Khawthlang ram ten Russia in a nuclear ralthuam a hman an ring lo” tiin a sawi a. “Nuclear dooctrine kan nei a, chutah chuan tu emaw chetlak dan chu kan sovereignty leh territorial integrity tana hlauhawm a nih chuan kan ralthuam neih te kan hmang thei tih a ni a. Hei hi lak zam mai mai chi a ni lo,” tiin a sawi.
Hei bakah hian Valdimir Putin chuan Russia-in nato territory beih a tum tia sawi chu a hnawl bawk a.
“Russia hi hmelma angin chhuah suh u. Nangmahni in inti na chawp mai mai a ni,” tiin Putin chuan a sawi a.
“Russia chuan Nato beih a duh niin an hria a. In mawl zo ta em ni? Tu ngihdan nge maw ni le? Thil awm ang lo a ni a, a awihawm lohzia in hre chiang,” tiin a sawi.